ముంబై ఇండియన్స్ మరియు చెన్నై సూపర్ కింగ్స్ మధ్య గురువారం జరిగిన ఐపీఎల్ 2026 33వ మ్యాచ్లో వాతావరణం ఒక్కసారిగా వేడెక్కింది. ముంబై బ్యాటర్ తిలక్ వర్మ మరియు సిఎస్కే బౌలర్ జేమీ ఓవర్టన్ మధ్య మైదానంలోనే మాటల యుద్ధం నడిచింది. సాధారణంగా ఎంతో ప్రశాంతంగా ఉండే సూర్యకుమార్ యాదవ్ కూడా ఈ గొడవలో తలదూర్చడంతో ఉత్కంఠ పెరిగింది.
అసలేం జరిగింది? ముంబై ఇండియన్స్ ఇన్నింగ్స్ 10వ ఓవర్లో ఈ ఘటన చోటుచేసుకుంది. ఓవర్టన్ వేసిన ఆఖరి బంతిని తిలక్ మిడ్ వికెట్ వైపు ఆడి సింగిల్ తీసుకున్నాడు. నిజానికి తిలక్ రెండో రన్ కోసం పిలిచినప్పటికీ, సూర్యకుమార్ యాదవ్ ఒక పరుగుకే పరిమితం కావడం సరైనదని భావించాడు. ఆ తర్వాత అకస్మాత్తుగా ఓవర్టన్ మరియు తిలక్ మధ్య వాగ్వాదం మొదలై అందరి దృష్టిని ఆకర్షించింది.
పిచ్ మధ్యలో డ్రామా: బంతిని పట్టుకోవడానికి ఓవర్టన్ స్టంప్స్ వద్దకు రాగా, తిలక్ ఏదో విషయంలో అసహనానికి గురయ్యాడు. బౌలర్ అడ్డంగా నిలబడటం వల్ల ఫీల్డర్ ఎక్కడ ఉన్నాడో తనకు కనిపించడం లేదని తిలక్ వాదించాడు. “నేను ఫీల్డర్ను చూడలేకపోతున్నాను” అని తిలక్ అన్న మాటలు స్టంప్ మైక్లో రికార్డ్ అయ్యాయి. బౌలర్ తన చూపుకి అడ్డంగా రావడం తిలక్కు నచ్చలేదు.
అయితే ఓవర్టన్ కూడా తక్కువ తినలేదు; అతను తిలక్కు ఘాటుగానే బదులిచ్చాడు. ఇద్దరు ఆటగాళ్లు ఒకరికొకరు సైగలు చేసుకుంటూ ముందుకు రావడంతో పరిస్థితి సీరియస్ అయ్యింది. ఈ సమయంలో సూర్యకుమార్ యాదవ్ కూడా చర్చలో భాగమై తన టీమ్ మేట్ (తిలక్) తరపున వాదించాడు.
అంపైర్ల జోక్యం: పరిస్థితి చేయి దాటిపోతోందని గ్రహించిన ఫీల్డ్ అంపైర్లు వెంటనే జోక్యం చేసుకుని ఆటగాళ్లను శాంతింపజేశారు. కొంత సమయం తర్వాత మ్యాచ్ తిరిగి ప్రారంభమైంది. ఐపీఎల్ ‘ఎల్ క్లాసికో’గా పిలిచే ఈ మ్యాచ్లోని ఈ డ్రామా వీడియో సోషల్ మీడియాలో దావాగ్నిలా వ్యాపించింది.
చివరికి అంతా సద్దుమణిగింది: మైదానంలో ఎంత గొడవ జరిగినప్పటికీ, మ్యాచ్ ముగిసిన తర్వాత ఆటగాళ్ల మధ్య స్నేహపూర్వక వాతావరణం కనిపించింది. మ్యాచ్ అనంతరం ఇరు జట్ల ఆటగాళ్లు కరచాలనం చేసుకున్నప్పుడు తిలక్ మరియు ఓవర్టన్ ఒకరినొకరు కౌగిలించుకుని క్రీడా స్ఫూర్తిని చాటుకున్నారు.
సీఎస్కే ఏకపక్ష విజయం: మ్యాచ్ విషయానికి వస్తే.. ముంబై ఇండియన్స్పై ఐపీఎల్ చరిత్రలోనే పరుగుల పరంగా సిఎస్కే భారీ విజయాన్ని నమోదు చేసింది. మొదట బ్యాటింగ్ చేసిన సిఎస్కే 20 ఓవర్లలో 6 వికెట్ల నష్టానికి 207 పరుగులు చేసింది. లక్ష్య చేధనలో ముంబై ఇండియన్స్ 19 ఓవర్లలో కేవలం 104 పరుగులకే ఆలౌట్ అయ్యింది. ఈ మ్యాచ్లో తన 8వ ఐపీఎల్ సెంచరీని బాదిన సంజూ శామ్సన్ ‘ప్లేయర్ ఆఫ్ ది మ్యాచ్’గా నిలిచాడు.