యునైటెడ్ అరబ్ ఎమిరేట్స్ (UAE)లోని షార్జాలో జరిగిన ఈ ఘటన విన్నవారి గుండెలు తరుక్కుపోయేలా చేయడమే కాకుండా, ఆ తల్లిదండ్రుల మానవత్వానికి అందరి కళ్లు చెమర్చేలా చేస్తోంది.
కేరళకు చెందిన షెరాబుద్దీన్ – రూమి దంపతుల 22 నెలల కుమారుడు ‘ఆలన్’, ఒక సాయంత్రం సరదాగా పిల్లిని తరుముకుంటూ వెళ్లాడు. తల్లి తనను పట్టుకోవడానికి వస్తుండటాన్ని ఒక ఆటగా భావించి ఆ చిన్నారి వేగంగా పరిగెత్తగా, ఊహించని విధంగా ఆ దారిలో వస్తున్న కారు కింద పడిపోయాడు. అంతర్గత అవయవాలు దెబ్బతిని కొట్టుమిట్టాడుతున్న ఆ బాబును, ప్రమాదానికి కారణమైన డ్రైవరే వెంటనే ఆసుపత్రికి తరలించాడు.
అయితే, వైద్యులు ఎంత శ్రమించినా ఆ పసిప్రాణం నిలవలేదు. రాబోయే రమదాన్ మాసంలో ఉమ్రా యాత్ర ముగించుకుని, సొంత ఊరికి వెళ్లి అక్కడే స్థిరపడాలనుకున్న ఆ కుటుంబం కలలు ఒక్క నిమిషంలో ముక్కలయ్యాయి.
కుమారుడిని కోల్పోయిన ఆరని దుఃఖంలో కూడా, ఆ తల్లిదండ్రులు తీసుకున్న నిర్ణయం ప్రపంచానికే మానవత్వ పాఠం నేర్పింది. ప్రమాదానికి కారణమైన భారతీయ డ్రైవర్‌పై తాము ఎలాంటి ఫిర్యాదు చేయడం లేదని, అతడిని క్షమిస్తున్నామని షార్జా అధికారులకు ఆ దంపతులు లిఖితపూర్వకంగా తెలియజేశారు.
“మా కుమారుడిని కోల్పోవడం పూడ్చలేని లోటు, కానీ తెలియక జరిగిన ఒక తప్పు వల్ల మరొక కుటుంబం నాశనం అవ్వడం మాకు ఇష్టం లేదు” అని కన్నీళ్లతో షెరాబుద్దీన్ చెప్పిన మాటలు మొత్తం ఎమిరేట్స్‌ను కదిలించాయి. “దేవుడు మా కోసం వేరే ప్రణాళికలు ఉంచాడు” అని తమని తాము ఓదార్చుకుంటూ ఆ దంపతులు చూపిన ఈ ఉన్నతమైన గుణం సోషల్ మీడియాలో వైరల్ అవుతోంది.