బిర్యానీలో ఉప్పు ఎక్కువైందన్న చిన్న కారణంతో ఓ వ్యక్తి తన భార్యను దారుణంగా హత్య చేసిన ఘటన ముంబైలో కలకలం రేపింది. ముంబైలోని శివాజీ నగర్ పోలీసులు నిందితుడైన భర్తను అరెస్ట్ చేశారు.
ఘటన వివరాలు: పోలీసుల కథనం ప్రకారం, నిందితుడు 23 ఏళ్ల సివిల్ ఇంజనీర్ మంజర్ ఇమామ్ హుస్సేన్. మృతురాలు అతని భార్య నాజియా పర్వీన్ (20). నాజియా ఉత్తరప్రదేశ్‌లోని కుషీనగర్ నివాసి. వీరిద్దరూ ప్రేమ వివాహం చేసుకుని ముంబైలోని గోవాండి ప్రాంతంలో అద్దె ఇంట్లో నివసిస్తున్నారు.
చిన్న విషయాలకే గొడవలు: వీరిద్దరి మధ్య తరచూ చిన్నచిన్న విషయాలకే గొడవలు జరుగుతుండేవని పోలీసుల విచారణలో తేలింది. ఫోన్ మాట్లాడటం లేదా వంట సరిగ్గా లేదనే కారణాలతో భర్త ఆమెను వేధించేవాడు. భార్య చేసిన వంట అతనికి నచ్చేది కాదు, దీనివల్ల వారి మధ్య ఎప్పుడూ ఉద్రిక్తత నెలకొనేది.
ఆ రాత్రి ఏం జరిగింది?: డిసెంబర్ 19 రాత్రి 10 గంటల సమయంలో భోజనం చేస్తున్నప్పుడు బిర్యానీలో ఉప్పు ఎక్కువైందనే విషయమై ఇద్దరి మధ్య వాగ్వాదం మొదలైంది. కోపంతో ఊగిపోయిన హుస్సేన్, నాజియా తలను గోడకు బలంగా బాదాడు. తీవ్ర రక్తస్రావం కావడంతో ఆమె స్పృహతప్పి పడిపోయింది. శబ్దం విని వచ్చిన పొరుగువారు ఆమెను వెంటనే ఆసుపత్రికి తరలించారు, కానీ అప్పటికే ఆమె మరణించినట్లు వైద్యులు ధృవీకరించారు. మృతురాలి మేనమామ ఇచ్చిన ఫిర్యాదు మేరకు పోలీసులు కేసు నమోదు చేసి నిందితుడిని కటకటాల్లోకి నెట్టారు.