కర్ణాటక రాజధాని బెంగళూరులో సభ్యసమాజం తలదించుకునే ఘటన ఒకటి వెలుగుచూసింది. నగరంలోని ప్రముఖ ‘సంధ్యా థియేటర్’ లేడీస్ టాయిలెట్‌లో రహస్య కెమెరా అమర్చినట్లు మహిళలు ఆరోపించారు. ఈ ఘటన మడివాళ పోలీస్ స్టేషన్ పరిధిలో జరిగింది.
అసలేం జరిగింది?
థియేటర్‌కు వచ్చిన కొందరు మహిళలు వాష్‌రూమ్ ఉపయోగిస్తున్న సమయంలో అక్కడ అమర్చిన కెమెరాను గమనించారు. వెంటనే అప్రమత్తమైన మహిళలు గట్టిగా కేకలు వేస్తూ అందరినీ పిలిచారు. దాంతో అక్కడ ఉన్న జనం వెంటనే స్పందించి, కెమెరా అమర్చిన వ్యక్తిని రెడ్ హ్యాండెడ్‌గా పట్టుకున్నారు. ఆగ్రహించిన జనం నిందితుడిని చితకబాది, ఆపై పోలీసులకు అప్పగించారు.
ఏ సినిమా ప్రదర్శనలో ఈ ఘటన జరిగింది?
థియేటర్‌లో విక్టరీ వెంకటేష్ నటించిన బ్లాక్‌బస్టర్ తెలుగు సినిమా ‘నువ్వు నాకు నచ్చావ్’ రీ-రిలీజ్ షో నడుస్తున్న సమయంలో ఈ విషయం వెలుగులోకి వచ్చింది.
మడివాళ పోలీసులు నిందితుడిని అదుపులోకి తీసుకుని విచారణ ప్రారంభించారు. ఆ కెమెరాను ఏ ఉద్దేశంతో అక్కడ అమర్చారు? అందులో ఏమైనా వీడియోలు రికార్డ్ అయ్యాయా? అనే కోణంలో పోలీసులు దర్యాప్తు చేస్తున్నారు.