న్యూఢిల్లీ: ఆగ్నేయ ఢిల్లీలోని గోవిందపురి ప్రాంతంలో బుధవారం రాత్రి ఒక తండ్రికి ఊహించని విషాదం ఎదురైంది. రోజువారీ పని ముగించుకుని ఇంటికి వచ్చిన ఆయనకు, ఇంట్లో భార్య, కుమారుడు రక్తపు మడుగులో విగతజీవులై కనిపించారు.
మృతులను శారద (42), కుశాల్ (15)గా గుర్తించారు.
ఏం జరిగింది?
ఢిల్లీ పోలీసులు తెలిపిన వివరాల ప్రకారం, బుధవారం రాత్రి తండ్రి తన దుకాణం మూసివేసి ఇంటికి చేరుకున్నారు. ఇంటి తలుపులు తెరిచి ఉండటంతో అనుమానం వచ్చి లోపలికి వెళ్లి చూడగా, కిచెన్లో తన భార్య, కుమారుడు రక్తపు మడుగులో పడి ఉన్నారు. గుర్తు తెలియని దుండగులు పదునైన ఆయుధంతో వారిద్దరిపై విచక్షణారహితంగా దాడి చేసి హత్య చేసినట్లు ప్రాథమికంగా తేలింది.
ఆ సమయంలో ఇంట్లో భార్య, కుమారుడు మాత్రమే ఉన్నారని తండ్రి పోలీసులకు తెలిపారు. మృతదేహాలను చూసి షాక్కు గురైన ఆయన, వెంటనే స్థానికులను పిలిచి పోలీసులకు సమాచారం అందించారు.
దర్యాప్తు కొనసాగిస్తున్న పోలీసులు
ఘటనా స్థలానికి చేరుకున్న పోలీసులు మృతదేహాలను స్వాధీనం చేసుకుని పోస్ట్మార్టం కోసం తరలించారు. ఫొరెన్సిక్ బృందం కూడా ఆధారాలను సేకరించింది. తల్లి, కుమారులపై ఒకే రకమైన పదునైన ఆయుధంతో దాడి చేసినట్లు దర్యాప్తులో వెల్లడైంది. నిందితులపై ఎటువంటి స్పష్టమైన ఆధారాలు ఇంకా లభించలేదు. దీనిపై దర్యాప్తు చేసేందుకు ఢిల్లీ పోలీసులు ప్రత్యేక బృందాలను ఏర్పాటు చేశారు. ఆ ప్రాంతంలోని సీసీటీవీ ఫుటేజీలను పరిశీలిస్తున్నారు. పాత కక్షలు ఏవైనా ఉన్నాయా అనే కోణంలో స్థానికులు, బంధువులను విచారిస్తున్నారు.