మధురై: మధురై జిల్లా తిరుమంగళం ప్రాంతానికి చెందిన 13 ఏళ్ల బాలిక స్థానిక ప్రభుత్వ పాఠశాలలో 8వ తరగతి చదువుతోంది. ఆ ప్రాంతంలోని ఒక ఆలయంలో జరుగుతున్న ఉత్సవాలకు ఆ బాలిక వెళ్ళింది. అదే ఉత్సవానికి వచ్చిన, ఆ బాలికకు తెలిసిన నలుగురు బాలురు, ఆమెను ఎగ్జిబిషన్ గ్రౌండ్ వెనుక ఉన్న అటవీ ప్రాంతానికి రమ్మని పిలిచారు. తనకు తెలిసిన వారే కావడంతో బాలిక వారితో వెళ్ళింది. నిర్మానుష్యంగా, విద్యుత్ దీపాలు లేని ఆ అడవి ప్రాంతంలో ఆ నలుగురు బాలురు బాలికపై లైంగిక దాడికి పాల్పడ్డారు. అనంతరం ఆమెను అక్కడే వదిలేసి పరారయ్యారు.
బాధిత బాలిక ఫిర్యాదు: సంఘటనతో దిగ్భ్రాంతికి గురైన బాలిక ఏడుస్తూ ఇంటికి చేరుకుంది. బాలిక ఎందుకు ఏడుస్తోందో అడిగి తెలుసుకున్న తల్లిదండ్రులు, జరిగిన దారుణాన్ని విని షాక్కు గురయ్యారు. వెంటనే వారు స్థానిక పోలీస్ స్టేషన్లో ఫిర్యాదు చేశారు. పోలీసులు కేసు నమోదు చేసి దర్యాప్తు చేపట్టారు. బాలికను చికిత్స కోసం స్థానిక ఆసుపత్రికి తరలించారు.
పోక్సో చట్టం కింద కేసు నమోదు: పోలీసుల విచారణలో అదే ప్రాంతానికి చెందిన నలుగురు బాలురు ఈ దారుణానికి పాల్పడినట్లు తేలింది. వారిని విచారించగా, బాలికపై లైంగిక దాడి చేసినట్లు వారు అంగీకరించారు. నిందితులపై పోక్సో (POCSO) చట్టం సహా వివిధ సెక్షన్ల కింద కేసులు నమోదు చేసి, వారిని అదుపులోకి తీసుకున్నారు. నిందితుల్లో ముగ్గురికి 16 ఏళ్లు, ఒకరికి 13 ఏళ్లు ఉన్నట్లు పోలీసులు తెలిపారు. అనంతరం వారిని కోర్టులో హాజరుపరిచి, జువైనల్ హోమ్కు తరలించారు. 13 ఏళ్ల బాలికపై నలుగురు మైనర్లు సామూహిక లైంగిక దాడికి పాల్పడిన ఈ ఘటన ఆ ప్రాంతంలో తీవ్ర సంచలనం సృష్టించింది.