ఉత్తరప్రదేశ్‌లోని హాపుడ్‌లో గుండెలవిసే దారుణ ఘటన వెలుగులోకి వచ్చింది. ఇక్కడ దొంగతనం చేశాడనే అనుమానంతో ఒక 7 ఏళ్ల బాలుడిని సుమారు 5 గంటల పాటు డీప్ ఫ్రీజర్‌లో బంధించి ఉంచారు. మంగళవారం జరిగిన ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.
ఆ బాలుడు అదే ప్రాంతంలో నివసించే ఒక వ్యక్తి కుమారుడు. కార్ వర్క్‌షాప్ నడుపుతున్న మొహమ్మద్ ఆజాద్ అనే వ్యక్తి ఆ బాలుడిని ఫ్రీజర్‌లో బంధించాడు. తన వర్క్‌షాప్ నుండి బాలుడు ఏదో వస్తువు దొంగిలించాడని అనుమానించిన ఆజాద్, అతడికి ‘బుద్ధి చెప్పాలని’ ఈ దారుణానికి ఒడిగట్టాడు.
చిన్నారి భయంతో వణికిపోయాడు
వైరల్ వీడియోలో కనిపిస్తున్న దృశ్యాల ప్రకారం, గ్రామస్థులు జోక్యం చేసుకుని బాలుడిని బయటకు తీసినప్పుడు, ఆ చిన్నారి భయంతో వణికిపోతూ ఏడుస్తున్నాడు. ఈ ఉదంతంపై పోలీసులు కేసు నమోదు చేసి నిందితుడిని అరెస్ట్ చేశారు.
ఎస్‌హెచ్‌ఓ (SHO) అవనీష్ కుమార్ మాట్లాడుతూ, “పోలీసులు ఈ విషయాన్ని సుమోటోగా స్వీకరించారు. నిందితుడిపై BNSS సెక్షన్ 170 (నేరాలను అరికట్టేందుకు అరెస్ట్ చేయడం) కింద FIR నమోదు చేశాం. ఆజాద్‌ను మంగళవారం అదుపులోకి తీసుకుని జైలుకు పంపాం,” అని తెలిపారు.