న్యూఢిల్లీ: దేశ రాజకీయాల్లో భారతీయ జనతా పార్టీ (బీజేపీ) తన జైత్రయాత్రను కొనసాగిస్తోంది. తాజాగా బీహార్ ముఖ్యమంత్రిగా సమ్రాట్ చౌదరి (Samrat Choudhary) ప్రమాణ స్వీకారం చేయడంతో, దేశవ్యాప్తంగా బీజేపీ సొంతంగా అధికారంలో ఉన్న రాష్ట్రాల సంఖ్య 16కు చేరింది. ఎన్డీయే కూటమి అధికారంలో ఉన్న ఇతర రాష్ట్రాలను కలిపితే ప్రతిపక్షాల కంటే బీజేపీ బలం భారీగా పెరిగింది. అయితే, ఈ 16 మంది ముఖ్యమంత్రుల జాబితాను నిశితంగా పరిశీలిస్తే ఒక ఆసక్తికరమైన అంశం వెలుగులోకి వస్తోంది. కమలం గూటిలో ముఖ్యమంత్రులుగా ఉన్న వారిలో మెజారిటీ నేతలు ఒకప్పుడు ఇతర పార్టీల నుంచి వచ్చిన వారే కావడం గమనార్హం.
బిజెపి ముఖ్యమంత్రుల జాబితా:
- అరుణాచల్ ప్రదేశ్: పెమా ఖండూ
- అసోం: హిమంత బిశ్వ శర్మ
- బీహార్: సమ్రాట్ చౌదరి
- ఛత్తీస్గఢ్: విష్ణు దేవ్ సాయ్
- ఢిల్లీ: రేఖా గుప్తా
- గోవా: ప్రమోద్ సావంత్
- గుజరాత్: భూపేంద్ర పటేల్
- హర్యానా: నాయబ్ సింగ్ సైనీ
- మధ్యప్రదేశ్: మోహన్ యాదవ్
- మహారాష్ట్ర: దేవేంద్ర ఫడ్నవీస్
- మణిపూర్: యుమ్నమ్ ఖేమ్చంద్ సింగ్
- ఒడిశా: మోహన్ చరణ్ మాఝీ
- రాజస్థాన్: భజన్లాల్ శర్మ
- త్రిపుర: మాణిక్ సాహా
- ఉత్తరాఖండ్: పుష్కర్ సింగ్ ధామీ
- ఉత్తరప్రదేశ్: యోగి ఆదిత్యనాథ్
వలస నేతలే వారధులు!
బీజేపీ సిద్ధాంతాలతో సంబంధం లేకుండా, ఇతర పార్టీల నుంచి వచ్చి ముఖ్యమంత్రి పీఠాన్ని అధిష్టించిన నేతలు ఈ జాబితాలో అధికంగా ఉన్నారు:
- పెమా ఖండూ (అరుణాచల్ ప్రదేశ్): 2015లో కాంగ్రెస్ నుంచి తన కేబినెట్ మొత్తంతో సహా బీజేపీలోకి చేరారు.
- హిమంత బిశ్వ శర్మ (అసోం): ఈయన కాంగ్రెస్ నేపథ్యం అందరికీ తెలిసిందే. అలాగే అసోం మాజీ సీఎం శర్బానంద సోనోవాల్ కూడా ఒకప్పుడు అసోం గణపరిషత్ నేత.
- మణిపూర్ & త్రిపుర: మణిపూర్ ప్రస్తుత సీఎం ఖేమ్చంద్ సింగ్, మాజీ సీఎం బీరేన్ సింగ్లు కాంగ్రెస్ నుంచి వచ్చిన వారే. త్రిపుర సీఎం మాణిక్ సాహాకు కూడా కాంగ్రెస్ గతం ఉంది.
- సమ్రాట్ చౌదరి (బీహార్): ఈ జాబితాలో లేటెస్ట్ ఎంట్రీ సమ్రాట్ చౌదరిదే. ఈయన రాజకీయ ప్రస్థానం లాలూ ప్రసాద్ యాదవ్ (RJD) పార్టీతో మొదలైంది. ఆ తర్వాత నితీష్ కుమార్ (JDU), జితన్ రామ్ మాంఝీ పార్టీల మీదుగా బీజేపీలోకి చేరి.. ఇప్పుడు ఏకంగా ముఖ్యమంత్రి పీఠాన్ని దక్కించుకున్నారు.
సొంత కేడర్ కంటే వలసలకే పట్టం?
యూపీ సీఎం యోగి ఆదిత్యనాథ్ లాంటి అతికొద్ది మంది నేతలు మినహా, మిగిలిన రాష్ట్రాల్లో ఇతర పార్టీల నుంచి వచ్చిన వ్యూహకర్తలకే బీజేపీ పెద్దపీట వేస్తోంది. ఇది పార్టీ పటిష్టతకు సహాయపడుతున్నప్పటికీ, పాత తరం బీజేపీ కార్యకర్తల్లో చర్చకు దారితీస్తోంది. ఏదేమైనా, 16 రాష్ట్రాల్లో తమ జెండా ఎగురవేయడం ద్వారా బీజేపీ జాతీయ రాజకీయాల్లో తిరుగులేని శక్తిగా అవతరించింది.