బెంగళూరు: వివిధ జిల్లాల నుండి, పొరుగు రాష్ట్రాల నుండి ప్రతిరోజూ లక్షలాది మంది వచ్చి వెళ్లే నగర కేంద్ర బిందువు ‘మెజెస్టిక్’ ప్రాంతం ఇప్పుడు నేరగాళ్లకు, దోపిడీదారులకు మరియు వ్యభిచార ముఠాలకు నిలయంగా మారింది.
మెజెస్టిక్‌కు వచ్చే సామాన్యులకు అక్కడ ఎవరు మంచివారో, ఎవరు చెడ్డవారో తెలియక తమ వద్ద ఉన్నదంతా కోల్పోతున్నారు. ముఖ్యంగా తెల్లవారుజామున, రాత్రి సమయాల్లో మర్యాదస్తులు అక్కడ తిరగడమే కష్టంగా మారింది. రాత్రి 9:30 తర్వాత ఎవరైనా మద్యం మత్తులో ఉన్నా లేదా అనారోగ్యంతో పడుకున్నా, వారి జేబులు గుల్ల చేస్తున్నారు. ఎదురుతిరిగితే కత్తులతో బెదిరిస్తున్నారు.
మహిళల పట్ల అసభ్య ప్రవర్తన రాత్రి వేళల్లో మహిళలు ఒంటరిగా బస్సు స్టాండ్‌కు వస్తే, వారిని లైంగిక కార్మికులుగా భావించి వేధించే దుస్థితి నెలకొంది. పురుషులు ఒంటరిగా వెళ్తుంటే లైంగిక కార్మికులు, ట్రాన్స్‌జెండర్లు అడ్డుకొని ఇబ్బంది పెడుతున్నారు. ముఖ్యంగా హిందీ లేదా ఉత్తర భారత భాషలు మాట్లాడే వారిని లక్ష్యంగా చేసుకుని దోపిడీలు జరుగుతున్నాయి. గుబ్బి తోటదప్ప రోడ్డు, ధన్వంతిరి రోడ్డును కలిపే ఫుట్ ఓవర్ బ్రిడ్జిలు, రైల్వే స్టేషన్ వైపు వెళ్లే అండర్ పాస్‌లు అత్యంత ప్రమాదకరంగా మారాయి.
ఇటీవలి సంఘటనలు
- తుమకూరుకు చెందిన 18 ఏళ్ల యువతి ఇల్లు వదిలి మెజెస్టిక్‌కు రాగా, ఆమెకు పరిచయమైన ఒక యువతి ఆమెను వ్యభిచార రొంపిలోకి దించింది. పోలీసులు వెతికి పట్టుకునేసరికి ఆమె ఆ ముఠా చిక్కుల్లో పడిపోయింది.
- విజయపురకు చెందిన మరో బాలిక బాల్య వివాహం ఇష్టం లేక పారిపోయి రాగా, ఒక అపరిచిత వ్యక్తి ఆమెను వేధించే ప్రయత్నం చేశాడు. అయితే ఒక ప్రైవేట్ సంస్థ ఉద్యోగిని ఆమెకు సాయం చేసి ‘సఖి’ కేంద్రానికి తరలించి కాపాడారు.
నియంత్రణ లేని వైనం పోలీసుల గస్తీ సరిగ్గా లేకపోవడం వల్లే ఇలా జరుగుతోందని ప్రజలు వాపోతున్నారు. గతంలో ఉన్న ‘ఒనకే ఓబవ్వ’ పడె (మహిళా పోలీసు బృందం) ఇప్పుడు నిర్వీర్యమైందని, పోలీసులు మాటు వేసి నేరగాళ్లను పట్టుకోవాలని కోరుతున్నారు. దోపిడీదారులకు, ఆటో డ్రైవర్లకు మధ్య ఉన్న రహస్య ఒప్పందాల వల్ల ఈ దందాలు సజావుగా సాగుతున్నాయని ఆరోపణలు వస్తున్నాయి.
పోలీసుల వివరణ గడిచిన వారంలో దోపిడీకి సంబంధించి నాలుగు కేసులు నమోదు చేశామని, మెజెస్టిక్ పరిసరాల్లో గస్తీ పెంచుతామని వెస్ట్ డివిజన్ డిసిపి ఎన్. యతీష్ తెలిపారు.