సంభల్ (ఉత్తరప్రదేశ్): ఇన్స్టాగ్రామ్లో ఒక లక్షకు పైగా ఫాలోవర్లు ఉన్న ప్రముఖ మహిళా ఇన్ఫ్లుయెన్సర్ అర్షా, ఆమె స్నేహితులు అనస్, షుఐబ్లు కలిసి.. మొహమ్మద్ షారూక్ అనే యువకుడిని ప్రేమ పేరుతో నమ్మించి, బ్లాక్మెయిల్ చేసిన ఉదంతం వెలుగులోకి వచ్చింది. బాధితుడి ఫిర్యాదు మేరకు సంభల్ పోలీసులు కేసు నమోదు చేశారు.
దాదాపు మూడేళ్ల క్రితం వీరికి ఇన్స్టాగ్రామ్ ద్వారా పరిచయం ఏర్పడింది. ఆ తర్వాత నైనిటాల్కు విహారయాత్రకు వెళ్లినప్పుడు మొదటిసారి వీరు నేరుగా కలుసుకున్నారు. వీరి స్నేహం కాస్తా కాలక్రమేణా సన్నిహితంగా మారింది. ఈ పరిస్థితిని ఆసరాగా చేసుకుని అర్షా, షారూక్కు సంబంధించిన కొన్ని వ్యక్తిగత మరియు ప్రైవేట్ ఫోటోలు, వీడియోలను రహస్యంగా రికార్డ్ చేసింది.
నగ్న చిత్రాలతో బ్లాక్మెయిల్.. ₹4 లక్షలు స్వాహా!
ఆ ఫోటోలు, వీడియోలను సోషల్ mediaలో లీక్ చేస్తామని, అలాగే తనపై అక్రమ కేసులు పెట్టిస్తామని అర్షా, ఆమె స్నేహితులు షారూక్ను బెదిరించడం ప్రారంభించారు. సమాజంలో ఎక్కడ బద్నాం అవుతానో అనే భయంతో షారూక్ వివిధ సందర్భాల్లో ఆన్లైన్ ద్వారా దాదాపు ₹4 లక్షల రూపాయల వరకు వారికి చెల్లించాడు.
ఒప్పందం చేసుకున్నా ఆగని వేధింపులు:
గత 2023 జూలైలో ఇరువర్గాల మధ్య స్టాంప్ పేపర్పై ఒక అధికారిక రాజీ ఒప్పందం జరిగింది. అందులో తనపై గతంలో చేసిన ఆరోపణలన్నీ అబద్ధాలని, తాము ఇకపై గొడవపడమని అర్షా రాసిచ్చింది. అయినప్పటికీ, కొద్దిరోజులకే ఆమె మళ్లీ పాత బుద్ధిని చూపిస్తూ.. అదనంగా మరో ₹2 లక్షలు ఇవ్వాలంటూ బ్లాక్మెయిల్కు దిగింది.
పోలీసులను ఆశ్రయించిన బాధితుడు
ఈ నిరంతర మానసిక వేదనను భరించలేకపోయిన షారూక్, చివరకు గట్టి నిర్ణయం తీసుకున్నాడు. నిందితులకు తలొగ్గకూడదని భావించి.. తన వద్ద ఉన్న బ్యాంక్ లావాదేవీల ఆధారాలు, వాట్సాప్ చాటింగ్ స్క్రీన్షాట్లతో పోలీసులను ఆశ్రయించి ఫిర్యాదు చేశాడు. ఈ ఘటనపై సంభల్ పోలీసులు అర్షాతో పాటు మరో ఇద్దరిపై ఎఫ్ఐఆర్ (FIR) నమోదు చేసి, ప్రస్తుతం పరారీలో ఉన్న నిందితుల కోసం తీవ్రంగా గాలిస్తున్నారు.