భారత ఈశాన్య రాష్ట్రాలను విడగొట్టి కొత్త దేశాన్ని ఏర్పాటు చేయాలని ఖలిస్థానీ ఉగ్రవాది గుర్ పత్వంత్ సింగ్ పన్నూన్ అమెరికాలో ఉండి పిలుపునిచ్చాడు. పంజాబ్‌ను భారత్ నుండి వేరు చేయాలని కోరుకునే పన్నూన్, ఇటీవల ఒక మ్యాప్‌ను విడుదల చేశాడు. అందులో అస్సాం, మేఘాలయలోని ప్రధాన భాగాలు, మణిపూర్, మిజోరాం, త్రిపుర, నాగాలాండ్‌లను కలిపి ఒక కొత్త దేశంగా చూపించాడు.
ఈ ప్రతిపాదిత దేశానికి పన్నూన్ ‘ట్రంప్‌లాండ్’ (Trumpland) అని పేరు పెట్టాడు. అంతేకాకుండా, ఆ మ్యాప్‌లో అరుణాచల్ ప్రదేశ్‌ను చైనాలో భాగంగా చూపించాడు. గతంలో బంగ్లాదేశ్‌కు చెందిన తీవ్రవాద నాయకులు కూడా భారత ఈశాన్య రాష్ట్రాలను విడగొట్టాలని పిలుపునిచ్చారు. ఉస్మాన్ హదీ మరణం తర్వాత, భారత్‌కు వ్యతిరేకంగా ఉగ్రవాద కుట్రలు చేయాలని పన్నూన్ బంగ్లాదేశీయులను కోరడం గమనార్హం.
షీక్ హసీనా ఆరోపణలు మరియు క్రైస్తవ దేశం కుట్ర: గతంలో షేక్ హసీనా అధికారంలో ఉన్నప్పుడు, అమెరికా బంగ్లాదేశ్‌లోని ‘సెయింట్ మార్టిన్’ ద్వీపంలో సైనిక స్థావరాన్ని నిర్మించాలనుకుంటోందని ఆరోపించారు. భారత ఈశాన్య రాష్ట్రాల్లోని క్రైస్తవ ప్రాబల్యం ఉన్న ప్రాంతాలు, బంగ్లాదేశ్‌లోని చిట్టగాంగ్ కొండ ప్రాంతాలు మరియు మయన్మార్‌లోని రఖైన్ ప్రావిన్స్‌ను కలిపి ఒక ప్రత్యేక ‘క్రైస్తవ దేశం’గా మార్చే కుట్ర జరుగుతోందని ఆమె పేర్కొన్నారు. మొహమ్మద్ యూనస్ ప్రభుత్వం ప్రతిపాదించిన ‘హ్యుమానిటేరియన్ కారిడార్’ కూడా ఈ కుట్రలో భాగమేనా అనే అనుమానాలు వ్యక్తమవుతున్నాయి.
రోహింగ్యా ఉగ్రవాదుల కదలికలు: ఇటీవల బంగ్లాదేశ్ సరిహద్దుల్లో భారీగా సైనిక సామాగ్రిని తరలిస్తున్న ముగ్గురు యువకులను అరెస్టు చేశారు. మయన్మార్ మరియు చిట్టగాంగ్ సరిహద్దుల్లోని మాయు పర్వత అడవుల్లో రోహింగ్యా ఉగ్రవాదులకు సైనిక శిక్షణ అందుతున్నట్లు నివేదికలు చెబుతున్నాయి. ఈ ఉగ్రవాదులు మత్స్యకారుల వేషంలో నాఫ్ నది సమీపంలో తిరుగుతున్నారని సమాచారం. కాక్స్ బజార్‌లో పెరుగుతున్న రోహింగ్యా ఉగ్రవాదుల కార్యకలాపాలు ఇప్పుడు భారతదేశానికి కూడా తలనొప్పిగా మారే అవకాశం ఉంది.