బెంగళూరు: తమ నాలుగేళ్ల కుమారుడిని కారులోనే మర్చిపోయి దిగిపోయారు ఒక దంపతులు. వెంటనే రంగంలోకి దిగిన పోలీసులు ఆ చిన్నారిని సురక్షితంగా తల్లిదండ్రుల వద్దకు చేర్చారు.
ఘటన వివరాలు: ఫిబ్రవరి 14న ఈ ఘటన జరిగింది. ప్రయాణం ముగించుకుని ఇంటికి చేరుకున్న దంపతులు, టాక్సీ దిగే సమయంలో తమ బాబు కూడా దిగాడని భావించారు. కానీ కారు వెనుక సీట్లో నిద్రిస్తున్న బాబు దిగలేదనే విషయాన్ని వారు గమనించలేదు. వారు దిగిన వెంటనే డ్రైవర్ కారుతో సహా వెళ్ళిపోయాడు.
కాసేపటి తర్వాత బాబు తమతో లేడన్న విషయాన్ని గుర్తించిన తల్లిదండ్రులు హతాశులయ్యారు. వెంటనే ‘నమ్మ 112’ (Namma 112) హెల్ప్‌లైన్ నంబర్‌కు ఫోన్ చేసి సమాచారం అందించారు. బెంగళూరు పోలీసులు వెంటనే స్పందించారు.
సమాచారం అందిన రెండు నిమిషాల్లోనే పోలీసులు ఘటనా స్థలానికి చేరుకున్నారు. టాక్సీ నంబర్ మరియు లొకేషన్ ఆధారంగా డ్రైవర్‌ను ఫోన్‌లో సంప్రదించి, బాబు కారులోనే ఉన్నాడని నిర్ధారించుకున్నారు. వెంటనే కారును తల్లిదండ్రుల అపార్ట్‌మెంట్ వద్దకు తీసుకురావాలని ఆదేశించారు. పోలీసుల చురుకైన చర్యల వల్ల కేవలం గంట వ్యవధిలోనే బాబును తల్లిదండ్రుల వద్దకు చేర్చారు.