పిల్లలు తమ ప్రైవేట్ పార్ట్స్‌ను తరచుగా ఎందుకు తాకుతారు? ఈ పరిస్థితిని తల్లిదండ్రులు ఎలా ఎదుర్కోవాలి? దీని వెనుక ఉన్న అసలు కారణం ఏమిటి?
చాలా మంది పిల్లలు పబ్లిక్ ప్లేసెస్‌లో కూడా తమ ప్రైవేట్ పార్ట్స్‌ను తాకుతూ లేదా లాగుతూ ఉండటం చూసి తల్లిదండ్రులు తీవ్రమైన అసౌకర్యానికి, సిగ్గుకు లోనవుతుంటారు. ఇలాంటి సమయంలో పిల్లలను తిట్టడం లేదా కొట్టడం చేస్తుంటారు. కానీ, అది అస్సలు సరైన పద్ధతి కాదని ప్రముఖ శిశువైద్య నిపుణులు డాక్టర్ నిమిషా అరోరా తెలిపారు. దీని వెనుక ఉన్న పిల్లల మానసిక స్థితిని అర్థం చేసుకోవడం చాలా ముఖ్యం.
ఇది పూర్తిగా సాధారణ ప్రవర్తన: డాక్టర్ నిమిషా అరోరా ఒక వీడియోలో వివరిస్తూ.. చిన్నపిల్లలు (1 సంవత్సరం నుండి ప్రీ-స్కూల్ వయస్సు వరకు) తమ ప్రైవేట్ పార్ట్స్‌ను తాకడం అనేది చాలా సాధారణ విషయం. ఇందులో సిగ్గుపడటానికి ఏమీ లేదు.
- శరీరంపై అవగాహన: 4 నుండి 6 నెలల వయస్సు ఉన్నప్పటి నుండే పిల్లలు తమ శరీరం ఎలా ఉందో తెలుసుకోవడానికి ప్రయత్నిస్తారు. వారు పదే పదే కళ్ళు, ముక్కు, చెవులు ఎలా తాకుతారో.. అలాగే తమ ప్రైవేట్ పార్ట్స్‌ను కూడా ఒక శరీర అవయవంగా భావించి తాకుతారు.
- కుతూహలం: అది తమ శరీరంలో ఒక భాగమని తెలుసుకోవాలనే కుతూహలం (Curiosity) తప్ప ఇందులో ఎలాంటి అసభ్యత ఉండదు.
తల్లిదండ్రులు చేసే పొరపాట్లు: పిల్లలు అలా చేస్తున్నప్పుడు వారిని గట్టిగా తిట్టడం లేదా భయపెట్టడం వల్ల వారిలో ‘నేరం చేశామనే భావన’ (Guilt) ఏర్పడుతుంది. ఇది భవిష్యత్తులో వారి లైంగిక అవగాహనపై ప్రతికూల ప్రభావం చూపుతుంది. కాబట్టి, తల్లిదండ్రులు ప్రశాంతంగా ఉండాలి.
పరిష్కార మార్గాలు:
- సరైన పేర్లు నేర్పండి: పిల్లలకు 2 లేదా 2.5 ఏళ్ల వయస్సు వచ్చినప్పుడు, స్నానం చేయించే సమయంలో శరీర అవయవాలకు సరైన పేర్లు (ఉదాహరణకు పెనిస్ లేదా వెజైనా) నేర్పండి. దీనివల్ల వారి కుతూహలం తగ్గి, దానిని ఒక సాధారణ అవయవంగా చూస్తారు.
- దృష్టి మళ్లించండి (Distraction): బహిరంగ ప్రదేశాల్లో పిల్లలు ఇలా చేస్తున్నప్పుడు కంగారు పడకుండా, వారికి ఏదైనా ఆటవస్తువు ఇచ్చి లేదా మాటల్లో పెట్టి వారి దృష్టిని మరోవైపు మళ్లించాలి.
- డైపర్ లేదా దుస్తులు: పబ్లిక్ ప్లేసెస్‌లో ఉన్నప్పుడు పిల్లలకు డైపర్ లేదా ప్యాంట్ వేసి ఉంచడం ద్వారా ఈ అలవాటును నియంత్రించవచ్చు.
డాక్టర్‌ను ఎప్పుడు సంప్రదించాలి? సాధారణంగా స్కూల్ వయస్సు వచ్చేసరికి పిల్లలు ఈ అలవాటును మానేస్తారు. అయితే, ఈ క్రింది లక్షణాలు కనిపిస్తే వెంటనే డాక్టర్‌ను సంప్రదించాలి:
- ప్రైవేట్ పార్ట్స్ వద్ద ఎరుపుగా అవ్వడం లేదా దురద పెట్టడం.
- ఇన్ఫెక్షన్ లక్షణాలు కనిపించడం.
- వయస్సు పెరిగినా ఈ అలవాటు మానకపోవడం.