(గుజరాత్): “నా భార్యను తిరిగి బంగ్లాదేశ్కు బహిష్కరించవద్దు” అంటూ గుజరాత్లోని ఆనంద్ జిల్లాకు చెందిన ఒక వ్యక్తి రాష్ట్ర ప్రభుత్వానికి చేతులు జోడించి విజ్ఞప్తి చేస్తున్నాడు. తన భార్య హిందూ మతాన్ని స్వీకరించిందని, ఒకవేళ ఆమెను తిరిగి తన స్వదేశానికి పంపితే అక్కడ ఆమె ప్రాణాలకే ముప్పు వాటిల్లే ప్రమాదం ఉందని ఆందోళన వ్యక్తం చేస్తున్నాడు.
గుజరాత్ పోలీసులు అక్రమ బంగ్లాదేశ్ వలసదారులకు వ్యతిరేకంగా రాష్ట్రవ్యాప్తంగా నిర్వహిస్తున్న ‘ఆపరేషన్ డెల్టా హంట్’ (Operation Delta Hunt) అనే ప్రత్యేక నిఘా డ్రైవ్ సమయంలో ఈ ఉదంతం వెలుగులోకి వచ్చింది. సరైన వీసా, పాస్పోర్ట్ వంటి చెల్లుబాటు అయ్యే పత్రాలు లేకుండా భారతదేశంలో నివసిస్తున్నారనే ఆరోపణలపై సదరు మహిళను సుమారు రెండు వారాల క్రితం పోలీసులు అదుపులోకి తీసుకున్నారు.
దశాబ్ద కాలంగా అక్రమంగా నివాసం:
రాష్ట్ర డైరెక్టర్ జనరల్ ఆఫ్ పోలీస్ (DGP) కార్యాలయం విడుదల చేసిన గణాంకాల ప్రకారం.. ఈ జూన్ నెలలో ఇప్పటివరకు గుజరాత్లో అక్రమంగా నివసిస్తున్న 600 మందికి పైగా బంగ్లాదేశ్ పౌరులను పోలీసులు పట్టుకున్నారు. వీరిలో దాదాపు 60 మందిని ఒక్క ఆనంద్ జిల్లాలోనే అదుపులోకి తీసుకున్నారు. ఇలా అదుపులోకి తీసుకున్న వారిలో కాజల్ అనే మహిళ కూడా ఉంది. ఆమె భర్త తెలిపిన వివరాల ప్రకారం.. ఆమె సుమారు పదేళ్ల క్రితం అక్రమంగా సరిహద్దులు దాటి భారతదేశానికి వచ్చింది. ఆ తర్వాత ఆనంద్ జిల్లా నివాసి అయిన తరుణ్ పటేల్ను వివాహం చేసుకుంది.
ఫేస్బుక్ ప్రేమ.. ఆపై పెళ్లి:
ఆనంద్ జిల్లా లంభవేల్ గ్రామానికి చెందిన తరుణ్ పటేల్ మాట్లాడుతూ.. 2012-13 కాలంలో బంగ్లాదేశ్లో నివసిస్తున్న కాజల్తో తనకు ఫేస్బుక్ (Facebook) ద్వారా పరిచయం ఏర్పడిందని తెలిపారు. కాలక్రమేణా వీరి పరిచయం కాస్తా ప్రేమగా మారింది. తరుణ్ను చట్టబద్ధంగా వివాహం చేసుకోవడానికి కాజల్ బంగ్లాదేశ్లో పాస్పోర్ట్ పొందేందుకు ఎంతో ప్రయత్నించినప్పటికీ ఆమెకు పాస్పోర్ట్ లభించలేదని పటేల్ పేర్కొన్నారు.
మరోవైపు బంగ్లాదేశ్లోని ఆమె కుటుంబ సభ్యులు వేరే వ్యక్తితో పెళ్లి చేయాలని ఒత్తిడి తీసుకురావడంతో, ఆమె ప్రాణాలు చేతబట్టుకుని అక్రమ మార్గంలో భారతదేశానికి వచ్చి ఆనంద్ చేరుకుంది. “అప్పటి నుండి మేమిద్దరం భార్యాభర్తలుగా కలిసి జీవిస్తున్నాము. మాకు ఇద్దరు పిల్లలు ఉన్నారు. ఒకరి వయస్సు ఎనిమిదేళ్లు, మరొకరి వయస్సు రెండేళ్లు” అని తరుణ్ తెలిపారు. భారతదేశానికి వచ్చిన తర్వాత తామిద్దరం హిందూ సంప్రదాయాల ప్రకారం వివాహం చేసుకున్నామని, కాజల్ హిందూ జీవన విధానాన్ని అలవర్చుకుని క్రమం తప్పకుండా గుడులకు కూడా వెళ్తుందని ఆయన స్పష్టం చేశారు.
పోలీస్ కస్టడీలో భార్య.. హోంమంత్రికి అప్పీల్:
చెల్లుబాటు అయ్యే పత్రాలు లేవనే కారణంతో ఆనంద్ లోకల్ క్రైమ్ బ్రాంచ్ (LCB) పోలీసులు ఇటీవల కాజల్ను అదుపులోకి తీసుకున్నారు. ప్రస్తుతం ఆమెను బంగ్లాదేశ్కు డిపోర్ట్ (బహిష్కరణ) చేసే ప్రక్రియ జరుగుతోంది. ఈ నేపథ్యంలో గుజరాత్ హోం శాఖ సహాయ మంత్రి హర్ష్ సంఘ్వీకి తరుణ్ పటేల్ మానవీయ కోణంలో అప్పీల్ చేశారు.
“నా భార్య హిందూ మతాన్ని స్వీకరించింది. ఇప్పుడు ఆమెను బంగ్లాదేశ్కు పంపితే అక్కడి ఆమె కుటుంబం అంగీకరించకపోవచ్చు. అక్కడ ఉన్న తీవ్రవాద లేదా మతోన్మాద శక్తుల వల్ల ఆమె ప్రాణాలకే ప్రమాదం పొంచి ఉంది. నా భార్యను పిల్లల నుండి వేరు చేస్తే, నా ఇద్దరు పిల్లల పరిస్థితి ఏంటి?” అని తరుణ్ ఆవేదన వ్యక్తం చేశారు. తనను పెళ్లి చేసుకోవాలనే ఉద్దేశంతోనే ఆమె భారత్కు వచ్చిందని, భారత పౌరసత్వం పొందడానికి అవసరమైన అన్ని చట్టపరమైన ప్రక్రియలను తాము పూర్తి చేయడానికి సిద్ధంగా ఉన్నామని, దయచేసి ఈ కేసును సహానుభూతితో పరిశీలించాలని కోరారు.
అమ్మ కావాలంటూ కొడుకు రోదన:
ప్రస్తుతం చట్టపరమైన ప్రక్రియ పూర్తయ్యే వరకు కాజల్ను మహిళా హోమ్లో ఉంచినట్లు కుటుంబ సభ్యులు తెలిపారు. రెండు వారాలుగా పిల్లలు తమ తల్లిని చూడలేదని భర్త కన్నీరు పెట్టుకున్నాడు. వీరి పెద్ద కుమారుడు ధ్యాన్ కూడా అధికారులను వేడుకుంటూ.. “నేను మా అమ్మ లేకుండా బ్రతకలేను, దయచేసి మా అమ్మను త్వరగా వదిలేయండి” అని కోరాడు.
కాగా, ఈ వ్యవహారంపై అహ్మదాబాద్ రేంజ్ ఐజీ రాఘవేంద్ర వత్స్ స్పందిస్తూ.. ఈ ప్రత్యేక కేసు గురించిన పూర్తి వివరాలు ఇంకా తన వద్దకు రాలేదని, ఆనంద్ ఎస్పీ (SP) జి.జి. జసాని నుండి నివేదిక తీసుకున్న తర్వాతే దీనిపై స్పందిస్తానని తెలిపారు.