ఆరోగ్య విభాగం: ఉదయాన్నే నిద్రలేవగానే పడకను నీట్‌గా సర్దేయడం క్రమశిక్షణకు నిదర్శనం అని మనం భావిస్తాం. కానీ, ఈ మంచి అలవాటే మీ ఆరోగ్యానికి చేటు చేస్తుందని ఆరోగ్య నిపుణులు హెచ్చరిస్తున్నారు. నిద్రలేచిన వెంటనే బెడ్ షీట్లు మడతపెట్టడం వల్ల మీ పరుపులో ‘డస్ట్ మైట్స్’ (ధూళిలోని సూక్ష్మ జీవులు) వేగంగా వృద్ధి చెందే అవకాశం ఉందట. ఆశ్చర్యంగా అనిపించినా, దీని వెనుక ఉన్న శాస్త్రీయ కారణాలు తెలిస్తే మీరు షాక్ అవుతారు.
ఆకాష్ హెల్త్‌కేర్‌లోని శ్వాసకోశ మరియు నిద్ర రుగ్మతల విభాగం హెడ్ డాక్టర్ అక్షయ్ బుధరాజా వెల్లడించిన కీలక వివరాలు ఇవే:
- పరుపులో తేమ – సూక్ష్మజీవుల నిలయం: మనం రాత్రి నిద్రపోతున్నప్పుడు మన శరీరం నుండి వెలువడే వేడి, చెమట మరియు తేమను బెడ్ షీట్లు, పరుపు పీల్చుకుంటాయి. నిద్రలేవగానే వెంటనే పడకను సర్దేయడం వల్ల ఆ తేమ లోపలే ఉండిపోతుంది. ఇది డస్ట్ మైట్స్ పెరగడానికి అత్యంత అనుకూలమైన వాతావరణాన్ని (వేడి మరియు తేమ) కల్పిస్తుంది.
- ఏమిటీ డస్ట్ మైట్స్?: ఇవి కంటికి కనిపించని సూక్ష్మ జీవులు. ఇవి మన చర్మం నుండి రాలే మృత కణాల మీద జీవిస్తాయి. పరుపులో తేమ ఎక్కువగా ఉన్నప్పుడు ఇవి లక్షల సంఖ్యలో వృద్ధి చెందుతాయి. దీనివల్ల చర్మంపై దురదలు, అలర్జీలు మరియు శ్వాసకోశ ఇబ్బందులు తలెత్తుతాయి.
- అలర్జీల ముప్పు: ఇప్పటికే ఆస్తమా లేదా ఇతర అలర్జీలతో బాధపడేవారికి ఇది మరింత ప్రమాదకరం. తుమ్ములు రావడం, ముక్కు దిబ్బడ వేయడం లేదా చర్మంపై మంట రావడం వంటి లక్షణాలు కనిపిస్తాయి. అందుకే పడకను కొంతసేపు గాలికి వదిలేయడం ఉత్తమ మార్గం.
నిపుణులు సూచిస్తున్న మార్నింగ్ టిప్స్:
- బెడ్‌ను గాలికి వదిలేయండి: నిద్రలేవగానే దుప్పట్లు మడతపెట్టకుండా, పరుపుకు గాలి తగిలేలా వాటిని పక్కకు జరపండి.
- సూర్యరశ్మి సోకనివ్వండి: గది కిటికీలు, తెరలు (curtains) తెరవండి. సహజమైన వెలుతురు, గాలి లోపలికి వస్తే తేమ త్వరగా ఆరిపోతుంది.
- 30 నిమిషాల గ్యాప్: నిద్రలేచిన తర్వాత కనీసం అరగంట పాటు పడకను అలాగే వదిలేయండి. ఆ తర్వాతే సర్దుబాటు చేయండి.
- పరిశుభ్రత ముఖ్యం: తేమ పూర్తిగా పోయాక మాత్రమే బెడ్ షీట్లు మడతపెట్టండి. అలాగే వారానికి ఒకసారి తప్పనిసరిగా బెడ్ షీట్లు మార్చడం, ఉతకడం మర్చిపోవద్దు.
కాబట్టి, రేపటి నుండి నిద్రలేవగానే పడక సర్దడంలో కాస్త ఆలస్యం చేయండి.. అది మీ ఆరోగ్యానికే మేలు!