ఎంకూర్ ఫార్మాస్యూటికల్స్ ఎగ్జిక్యూటివ్ డైరెక్టర్ మరియు వ్యాపారవేత్త నమితా థాపర్ తనపై జరుగుతున్న ఆన్లైన్ వేధింపులపై తీవ్రంగా స్పందించారు. ద్వేషపూరిత వ్యాఖ్యలకు వ్యతిరేకంగా గట్టి సందేశం ఇస్తూ, అన్ని మతాల పట్ల పరస్పర గౌరవం ఉండాలని ఆమె పిలుపునిచ్చారు.
నమాజ్ వల్ల కలిగే శారీరక ఆరోగ్య ప్రయోజనాలను వివరిస్తూ ఆమె ఇటీవల చేసిన సోషల్ మీడియా పోస్ట్ ఆన్లైన్లో పెద్ద చర్చకు మరియు విమర్శలకు దారితీసింది.
సోషల్ మీడియాలో పంచుకున్న ఒక వీడియోలో, నమితా ఉదయం 7 గంటలకు ముంబైలో తన పనికి వెళ్లే క్రమంలో ఈ సందేశాన్ని రికార్డ్ చేశారు. తనను మాత్రమే కాకుండా తన తల్లిని కూడా ఉద్దేశించి చేస్తున్న అసభ్యకరమైన వ్యాఖ్యల గురించి మాట్లాడటానికి తాను మధ్యలోనే కారు ఆపాల్సి వచ్చిందని ఆమె తెలిపారు. “నన్ను నిరంతరం ‘రం*కుముండ’ (R**di) అని పిలుస్తున్నారు”** అని ఆమె ఆవేదన వ్యక్తం చేశారు. గౌరవం లేదా ప్రాథమిక మానవ హక్కులపై దాడి జరిగినప్పుడు మౌనంగా ఉండటం మంచిది కాదని ఆమె అన్నారు.
హిందూ సంప్రదాయాలపై కూడా వీడియోలు చేశాను:
షార్క్ ట్యాంక్ ఇండియా ద్వారా పాపులర్ అయిన నమితా, తనపై జరుగుతున్నది ‘సెలెక్టివ్ అవుట్రేజ్’ (ఎంచుకుని మరీ చేస్తున్న దాడి) అని పేర్కొన్నారు. ఒక హెల్త్ కేర్ ప్రొఫెషనల్గా, మతపరమైన ఆచారాలను కేవలం ఆరోగ్య దృక్కోణంలో మాత్రమే చూస్తానని ఆమె వివరించారు.
గతంలో తాను సూర్య నమస్కారాలు, యోగా ఆసనాల వంటి హిందూ సంప్రదాయాల గురించి వీడియోలు చేసినప్పుడు ఇటువంటి వ్యతిరేకత రాలేదని ఆమె గుర్తు చేశారు. ఈ ద్వంద్వ ప్రమాణాలను ప్రశ్నిస్తూ.. అన్ని మతాలు సమాన గౌరవానికి అర్హమని, ‘R for Religion అంటే R for Respect’ అని ఆమె పునరుద్ఘాటించారు.
షార్క్ ట్యాంక్ షోలో చేరినప్పటి నుండి ట్రోలింగ్ తనకు అలవాటేనని, కానీ ఈసారి అది హద్దులు దాటిందని ఆమె అన్నారు. ఇది తన వ్యక్తిగత గౌరవానికి సంబంధించిన విషయం మాత్రమే కాదని, ఒక సామాజిక సూత్రం కోసం తాను గళం విప్పుతున్నానని చెప్పారు.
అన్యాయంపై గళం విప్పడం మానవత్వం మరియు దేశభక్తి అని పేర్కొంటూ, తప్పును చూసి మౌనంగా ఉండటం వల్ల మరింత హాని జరుగుతుందని ఆమె తోటి భారతీయులను కోరారు. తన వీడియో చివరలో ‘కర్మ’ గురించి ప్రస్తావిస్తూ.. ద్వేషాన్ని వ్యాప్తి చేసే వారిని ‘దేవుడు చూస్తున్నాడు’ అని హెచ్చరించారు. చివరగా ‘జై హింద్’ అంటూ తన సందేశాన్ని ముగించారు.
లెన్స్కార్ట్ వివాదం నేపథ్యంలో..
ఇటీవల లెన్స్కార్ట్ (Lenskart) సంస్థలో ఒక ‘స్టైల్ గైడ్’ వివాదానికి దారితీసింది. హిందూ సంప్రదాయాలైన తిలకం, కంకణం (కాలవా) ధరించడాన్ని నియంత్రిస్తూ, ఇతర మతాల వస్త్రధారణను అనుమతించారనే వార్తలు వైరల్ అయ్యాయి. లెన్స్కార్ట్ వ్యవస్థాపకుడు పీయూష్ బన్సల్ (నమితా సహ-షార్క్) అది పాత శిక్షణ పత్రం మాత్రమేనని, కంపెనీ పాలసీ కాదని వివరణ ఇచ్చినప్పటికీ, దేశవ్యాప్తంగా బహిష్కరణ (Boycott) పిలుపులు వచ్చాయి. ఈ వివాదం వేడి చల్లారక ముందే నమితా థాపర్ వీడియో సంచలనంగా మారింది.