దిండుగల్: తమిళనాడులోని దిండుగల్ జిల్లా వత్తలగుండు ప్రాంతానికి చెందిన ఒక 16 ఏళ్ల బాలుడు, పట్టివీరన్‌పట్టిలోని ఒక పాఠశాలలో 9వ తరగతి చదువుతున్నాడు. చదువుకోవాల్సిన వయసులో ప్రేమ పేరుతో ఒక విద్యార్థినిని మోసం చేసి, ఆమె ఇంటి నుండి ఏకంగా 15 తులాల బంగారాన్ని కాజేసిన ఘటన స్థానికంగా కలకలం రేపింది.
అసలేం జరిగిందంటే?
నిందితుడైన విద్యార్థి తన పాఠశాలలోనే చదువుతున్న ఒక అమ్మాయితో స్నేహంగా నటించి, ఆపై ప్రేమిస్తున్నానని నమ్మబలికాడు. మాటల మధ్యలో ఆ అమ్మాయిని నగలు అడగడం మొదలుపెట్టాడు. అతడిని గుడ్డిగా నమ్మిన ఆ అమ్మాయి, తను వేసుకున్న కమ్మలు, ఉంగరం, గొలుసు వంటివి కొద్దికొద్దిగా అతడికి ఇచ్చేసింది.
ఆ తర్వాత సదరు విద్యార్థిని దిండుగల్‌లోని వేరే పాఠశాలలో చేరినప్పటికీ, వారిద్దరూ ఫోన్లలో మాట్లాడుకుంటూనే ఉండేవారు. దీనిని అదునుగా భావించిన ఆ బాలుడు.. ఇంట్లో ఉన్న నగలను కూడా తీసుకురావాలని ఆమెపై ఒత్తిడి తెచ్చాడు. అందుకు ఆ అమ్మాయి నిరాకరించడంతో, “నువ్వు నగలు తీసుకురాకపోతే మన ప్రేమ విషయం మీ తల్లిదండ్రులకు చెప్పేస్తాను” అంటూ బ్లాక్ మెయిల్ చేయడం మొదలుపెట్టాడు.
15 తులాల బంగారం అపహరణ
బాలుడి బెదిరింపులకు భయపడిన ఆ విద్యార్థిని, ఇంట్లో ఎవరికీ తెలియకుండా నగలను తీసుకెళ్లి అతడికి ఇచ్చింది. కొద్దిరోజుల తర్వాత ఇంట్లో నగలు కనిపించకపోవడంతో తల్లిదండ్రులు కంగారుపడి కూతురిని గట్టిగా నిలదీశారు. అప్పుడు ఆ అమ్మాయి జరిగిందంతా చెప్పడంతో వారు షాక్‌కు గురయ్యారు. తన సొంత నగలతో పాటు ఇంట్లో ఉన్నవి కలిపి మొత్తం 15 తులాల (15 Pavan) బంగారాన్ని ఆ అబ్బాయికి ఇచ్చినట్లు ఒప్పుకుంది.
పోలీసుల విచారణ – అరెస్ట్
బాధిత తల్లిదండ్రులు పోలీసులకు ఫిర్యాదు చేయడంతో రంగంలోకి దిగిన పోలీసులు విచారణ చేపట్టారు. విద్యార్థినిని బెదిరించి నగలు కాజేసిన ఆ బాలుడిని, అతడికి సహకరించిన మరో విద్యార్థిని పోలీసులు అరెస్ట్ చేశారు. వారిద్దరి వద్ద నుండి నగలను రికవరీ చేసే పనిలో ఉన్నారు.