బీహార్‌లో ఎన్డీయే ప్రభుత్వం భారీ మెజారిటీతో అధికారంలో ఉంది. ఈ క్రమంలో విపక్షాలు నిరంతరం రకరకాల వాదనలు వినిపిస్తున్నాయి. నితీష్ కుమార్‌ను ముఖ్యమంత్రి పదవి నుంచి తప్పించి, తన సొంత ముఖ్యమంత్రిని కూర్చోబెట్టాలని బీజేపీ భావిస్తోందని కూడా ప్రచారం జరుగుతోంది.
ఈ ఊహాగానాల మధ్య జేడీయూ (JDU) నాయకుడు దినేష్ చంద్ర యాదవ్ ఒక కీలక ప్రకటన చేశారు. బుధవారం (డిసెంబర్ 24, 2025) ఢిల్లీలో ఆయన మీడియాతో మాట్లాడుతూ.. ముఖ్యమంత్రి పదవిని వదిలిపెట్టే ప్రశ్నయే లేదని స్పష్టం చేశారు. “ఈ రోజుల్లో మీడియాలో వస్తున్న చర్చలను ఎవరూ ఆపలేరు. ఎవరికి తోచింది వారు ప్రచారం చేసుకుంటున్నారు” అని ఆయన పేర్కొన్నారు.
‘నితీష్ కుమార్ తన పదవీ కాలాన్ని పూర్తి చేస్తారు’ జేడీయూ నాయకుడు ఇంకా మాట్లాడుతూ.. “ఇంత భారీ మెజారిటీతో అధికారంలోకి వచ్చిన వ్యక్తిని ఎవరు తొలగిస్తారు? ఎందుకు వదులుకుంటారు? నితీష్ కుమార్ తన పూర్తి పదవీ కాలాన్ని పూర్తి చేస్తారు. ఆయన ఢిల్లీకి వచ్చింది రాష్ట్ర ప్రయోజనాల కోసమే. కేంద్ర బడ్జెట్ రాబోతోంది.. రాష్ట్రానికి ఏం కావాలో ఆయన ప్రధానమంత్రికి వివరించి ఉంటారు. ప్రధాని కూడా దానిపై సానుకూలంగా స్పందించి రాష్ట్రానికి అవసరమైన సాయం అందిస్తారు” అని చెప్పారు.
సోమవారం మోదీ, షాలతో భేటీ అయిన నితీష్ బీహార్ అసెంబ్లీ ఎన్నికల్లో అఖండ విజయం సాధించిన తర్వాత ముఖ్యమంత్రి నితీష్ కుమార్, ఉప ముఖ్యమంత్రి సామ్రాట్ చౌదరి, కేంద్ర మంత్రి లలన్ సింగ్‌లు సోమవారం ఢిల్లీలో ప్రధాని నరేంద్ర మోదీతో సమావేశమయ్యారు. ఈ భేటీ రాజకీయంగా, పరిపాలనాపరంగా ఎంతో కీలకమైనదని భావిస్తున్నారు. అసెంబ్లీ ఎన్నికల విజయం తర్వాత నితీష్ కుమార్‌కు ఇది మొదటి ఢిల్లీ పర్యటన. దీంతో ఈ భేటీ చుట్టూ అనేక రాజకీయ చర్చలు సాగుతున్నాయి. నితీష్ కుమార్ ఇప్పటికే పాట్నాకు చేరుకున్నప్పటికీ, ఈ పర్యటనపై రాజకీయ ప్రకటనలు కొనసాగుతూనే ఉన్నాయి.