ఉత్తరప్రదేశ్‌లోని వారణాసిలో జరిగిన ఓ ఘటన ప్రస్తుతం సోషల్ మీడియాలో, ప్రజల్లో చర్చనీయాంశంగా మారింది.
కూలీ పనులు చేస్తూ, ప్లంబింగ్ పనులు కూడా చేస్తూ… తన భార్యను ఉన్నత విద్య వరకు చదివించి, చివరకు ప్రభుత్వ ఉద్యోగం వచ్చేలా చేసిన భర్తనే ఆమె అవమానించి ఇంటి నుంచి వెళ్లగొట్టిందనే ఆరోపణలు వెలుగులోకి వచ్చాయి.
వారణాసిలోని సరస్వా గ్రామానికి చెందిన మాతా ప్రసాద్ యాదవ్కు, మమతా యాదవ్ అనే మహిళతో 2011లో వివాహం జరిగింది. పెళ్లి సమయంలో మమతా యాదవ్ ఇంటర్మీడియట్ వరకు మాత్రమే చదువుకున్నారు.
అయితే తన భార్యను బాగా చదివించాలనే ఉద్దేశంతో మాతా ప్రసాద్ కష్టపడ్డారు. కూలీ పనులతో పాటు ప్లంబింగ్ పనులు చేస్తూ సంపాదించిన డబ్బుతో ఆమె చదువుకు ఖర్చు చేశారు.
భర్త ప్రోత్సాహంతో మమతా యాదవ్ బీఏ, ఎంఏ, బీఎడ్ వరకు చదివారు. ఆ తర్వాత పోటీ పరీక్షలకు కూడా సిద్ధమయ్యారు. ఈ దంపతులకు ఇద్దరు పిల్లలు ఉన్నారు.
మాతా ప్రసాద్ చేసిన నిరంతర ప్రయత్నాల తర్వాత… 2022లో మమతా యాదవ్కు ప్రభుత్వ శాఖలో కానిస్టేబుల్ ఉద్యోగం వచ్చినట్లు కథనంలో పేర్కొన్నారు.
అయితే ప్రభుత్వ ఉద్యోగం వచ్చిన తర్వాత మమత ప్రవర్తనలో మార్పు వచ్చిందని భర్త ఆరోపించారు.
తనను “నువ్వు కూలీ పనులు చేస్తావు… ప్లంబింగ్ చేస్తూ టాయిలెట్లు శుభ్రం చేస్తావు. నిన్ను చూస్తేనే అసహ్యంగా ఉంది. నీతో కలిసి జీవించడం నాకు సిగ్గుగా ఉంది” అంటూ అవమానించిందని మాతా ప్రసాద్ ఆరోపించారు.
అంతేకాదు… పిల్లలు తన దగ్గరకు వస్తే “వాళ్లు కూడా నీలా కూలీలుగా మారిపోతారు” అంటూ పిల్లలను కూడా తనకు దూరంగా ఉంచేందుకు ప్రయత్నించిందని ఆయన ఆరోపించారు.
2024 జనవరి 8న మమత తన సోదరుడితో కలిసి ఇంటికి వచ్చి… బీరువాలో ఉన్న రూ.48 వేల నగదుతో పాటు బంగారు ఆభరణాలను తీసుకెళ్లిందని మాతా ప్రసాద్ ఆరోపించారు.
ఆ తర్వాత మే 12న మళ్లీ ఇంటికి వచ్చిన మమత… తనపై దాడి చేయడంతో పాటు పోలీసులను పిలిపించి తననే అవమానించిందని ఆయన ఫిర్యాదులో పేర్కొన్నారు.
ఈ విషయంపై పోలీస్ స్టేషన్‌లో ఫిర్యాదు చేసినప్పటికీ సరైన చర్యలు తీసుకోలేదని ఆరోపిస్తూ మాతా ప్రసాద్ కోర్టును ఆశ్రయించారు.
దీంతో సీజేఎం కోర్టు ఆదేశాల మేరకు శివపూర్ పోలీసులు మమతా యాదవ్, ఆమె తండ్రి, ఇద్దరు సోదరులపై కేసు నమోదు చేసి దర్యాప్తు చేపట్టారు.
ఈ కేసులో వచ్చిన ఆరోపణలు దర్యాప్తులో నిర్ధారణ కావాల్సి ఉంది.
Leave a Reply