నెలకు సుమారు రూ.3 లక్షల నుంచి రూ.3.5 లక్షల వరకు సంపాదించే 33 ఏళ్ల వైద్యుడు.. నెలకు రూ.18 వేల జీతం ఇచ్చి వ్యక్తిగత కారు డ్రైవర్‌ను నియమించుకోవడం సరైన నిర్ణయమేనా? అంటూ సోషల్ మీడియాలో ప్రశ్నించారు. ఆయన చేసిన ఈ పోస్ట్ ప్రస్తుతం నెట్టింట చర్చకు దారితీసింది.
రెండు వేర్వేరు ఆస్పత్రుల్లో పనిచేస్తున్న ఈ వైద్యుడు.. ప్రతిరోజూ కారులో సుమారు 60 కిలోమీటర్లు ప్రయాణించాల్సి వస్తోందని తెలిపారు. ట్రాఫిక్ రద్దీ, పార్కింగ్ సమస్యల కారణంగా ప్రతిరోజూ శారీరకంగా, మానసికంగా ఒత్తిడికి గురవుతున్నానని రెడిట్‌లో తన అనుభవాన్ని పంచుకున్నారు.
ఈ నేపథ్యంలో నెలకు రూ.18 వేలు ఖర్చు చేసి డ్రైవర్‌ను నియమించుకోవాలా? అని ఆయన నెటిజన్ల అభిప్రాయం కోరారు.
డ్రైవర్‌ను పెట్టుకోవడం ఖర్చు కాదు.. పెట్టుబడే!
వైద్యుడి పోస్ట్‌కు సోషల్ మీడియా వినియోగదారుల నుంచి పెద్ద ఎత్తున స్పందనలు వచ్చాయి.
మంచి ఆదాయం ఉన్నప్పుడు డ్రైవర్‌ను నియమించుకోవడం డబ్బు వృథా చేయడం కాదని, అది సమయం, ప్రశాంతత, జీవన నాణ్యత కోసం చేసే ఖర్చు అని పలువురు సూచించారు.
ప్రతిరోజూ ఎక్కువ దూరం డ్రైవింగ్ చేయడం వల్ల అలసట పెరుగుతుందని.. ముఖ్యంగా వైద్యుల వంటి బాధ్యతాయుతమైన ఉద్యోగాలు చేసేవారికి సరైన విశ్రాంతి చాలా అవసరమని కొందరు పేర్కొన్నారు.
డ్రైవర్ ఉంటే ప్రయాణ సమయంలో విశ్రాంతి తీసుకోవచ్చని.. అవసరమైతే కొన్ని వ్యక్తిగత లేదా వృత్తిపరమైన పనులను కూడా చూసుకోవచ్చని పలువురు తమ అనుభవాలను పంచుకున్నారు.
డబ్బు కంటే సమయం, ప్రశాంతత ముఖ్యం!
ఆస్పత్రుల్లో పనిచేసే వారికి శారీరక శ్రమతో పాటు మానసిక ఒత్తిడి కూడా ఉంటుందని.. అలాంటి పరిస్థితుల్లో సమయం ఆదా చేసుకోవడానికి, ఒత్తిడిని తగ్గించుకోవడానికి అవసరమైన ఖర్చులు చేయడం తప్పు కాదని నెటిజన్లు అభిప్రాయపడ్డారు.
అయితే డ్రైవర్‌ను నియమించుకోవాలా వద్దా అనేది వ్యక్తి ఆదాయం, ప్రయాణ అవసరాలు, పని సమయం, ఇతర ఖర్చులపై ఆధారపడి ఉంటుందని మరికొందరు సూచించారు.
మొత్తానికి.. నెలకు రూ.18 వేల డ్రైవర్ ఖర్చు చేయడం విలువైనదేనా? అనే ఒక వైద్యుడి ప్రశ్న.. సోషల్ మీడియాలో మాత్రం పెద్ద చర్చకు దారితీసింది.
Leave a Reply