మధ్యప్రాచ్యంలో యుద్ధ జ్వాలలు క్లైమాక్స్‌కు చేరుకున్నాయి. అమెరికా అధ్యక్షుడు డొనాల్డ్ ట్రంప్ ఆదేశాల మేరకు, ఇరాన్ ఓడరేవులపై సముద్ర దిగ్బంధాన్ని (Maritime Blockade) విధిస్తున్నట్లు అమెరికా సెంట్రల్ కమాండ్ (CENTCOM) సంచలన ప్రకటన చేసింది. నేడు (ఏప్రిల్ 13) ఉదయం నుంచే ఈ ఆంక్షలు అమలులోకి వస్తుండటంతో అరబిక్ గల్ఫ్, ఒమన్ గల్ఫ్ ప్రాంతాల్లో ఉద్రిక్తత పరాకాష్ఠకు చేరింది.
ఏప్రిల్ 13 ఉదయం 10 గంటల నుంచి అమల్లోకి..
అమెరికా సెంట్రల్ కమాండ్ వెల్లడించిన వివరాల ప్రకారం:
- ఇరాన్ ఓడరేవుల్లోకి ప్రవేశించే మరియు బయటకు వచ్చే అన్ని దేశాల నౌకలపై ఈ దిగ్బంధం వర్తిస్తుంది.
- ఈ విషయంలో ఎటువంటి పక్షపాతం ఉండదని, ఏ దేశపు నౌకనైనా అమెరికా నేవీ అడ్డుకుంటుందని హెచ్చరించింది.
- అయితే, ఇరాన్ కాకుండా ఇతర దేశాల ఓడరేవులకు వెళ్లే నౌకల ప్రయాణానికి (Freedom of Navigation) ఎటువంటి ఆటంకం కలిగించబోమని స్పష్టం చేసింది.
రంగంలోకి అమెరికా యుద్ధ నౌకలు
పాకిస్థాన్‌లో జరిగిన దౌత్యపరమైన చర్చలు విఫలం కావడంతో ట్రంప్ ఈ కఠిన నిర్ణయం తీసుకున్నారు. పర్షియన్ గల్ఫ్ ప్రాంతంలో ఇప్పటికే USS గెరాల్డ్ ఫోర్డ్, USS అబ్రహం లింకన్ వంటి భారీ యుద్ధ నౌకలను అమెరికా మోహరించింది. ఈ నౌకల ద్వారా ఇరాన్ సముద్ర మార్గాలను పూర్తిగా తమ నియంత్రణలోకి తెచ్చుకోవాలని వాషింగ్టన్ వ్యూహరచన చేస్తోంది. వాణిజ్య నౌకలన్నీ నిరంతరం కోస్టల్ గార్డ్ హెచ్చరికలను గమనిస్తూ ఉండాలని సూచించింది.
మృత్యు సుడిగుండంలోకి శత్రువు: ఇరాన్ హెచ్చరిక
అమెరికా చర్యలపై ఇరాన్ విప్లవాత్మక దళం (IRGC) తీవ్రంగా స్పందించింది. హోర్ముజ్ జలసంధి తమ పూర్తి నియంత్రణలో ఉందని, శత్రువు ఏదైనా తప్పుడు అడుగు వేస్తే సముద్రంలోని ‘మృత్యు సుడిగుండాల్లో’ చిక్కుకోవడం ఖాయమని హెచ్చరించింది.
“పాశ్చాత్య దేశాలు చేసే ఏ విధమైన దుశ్చర్యకైనా భారీ మూల్యం చెల్లించుకోక తప్పదు. సముద్ర మార్గంలో మా బలం ఏంటో చూపిస్తాం” అని ఇరాన్ కమాండ్ ఎక్స్ (X) వేదికగా హెచ్చరికలు జారీ చేసింది.
ప్రపంచ ఆర్థిక వ్యవస్థపై ప్రభావం?
ప్రపంచవ్యాప్త చమురు రవాణాలో కీలకమైన హోర్ముజ్ జలసంధి వద్ద ఈ దిగ్బంధం కొనసాగితే, అంతర్జాతీయ మార్కెట్‌లో క్రూడాయిల్ ధరలు ఆకాశాన్నంటే ప్రమాదం ఉందని నిపుణులు ఆందోళన వ్యక్తం చేస్తున్నారు. ఒకవైపు అమెరికా పట్టుదల, మరోవైపు ఇరాన్ ధిక్కారం వెరసి ఈ సముద్ర పోరాటం ఎటు దారితీస్తుందోనని ప్రపంచం ఉత్కంఠగా గమనిస్తోంది.