మధ్యప్రదేశ్ రాష్ట్రం ఛతర్పూర్లో భార్యాభర్తల మధ్య చెలరేగిన వివాదం తీవ్ర కలకలం రేపింది. పంకజ్ అహిర్వార్ అనే వ్యక్తి తన భార్య ఆర్తిని ఎంతో కష్టపడి చదివించి, ఆమె ప్రభుత్వ ఉపాధ్యాయురాలిగా ఉద్యోగం సాధించేందుకు తోడ్పడ్డానని తెలిపాడు.
భార్య టీచర్గా ఎంపికైన తర్వాత ఆమె ప్రవర్తనలో పూర్తిగా మార్పు వచ్చిందని, దీంతో తమ మధ్య తరచూ గొడవలు జరుగుతున్నాయని అతడు ఆరోపించాడు.
పంకజ్ తెలిపిన వివరాల ప్రకారం.. కుటుంబ ఆర్థిక ఇబ్బందులు ఉన్నప్పటికీ భార్య చదువు కోసం ఎంతో శ్రమించాడు. ఆమెకు ప్రభుత్వ ఉద్యోగం రావడంతో తాను చేస్తున్న పనిని ఆపేసి, ఇంట్లోనే ఉంటూ ముగ్గురు పిల్లల సంరక్షణ బాధ్యతలను చూసుకుంటున్నాడు. అయితే తాజాగా భార్య కుటుంబ సభ్యులతో ఏర్పడిన వివాదం కారణంగా తనను ఇంట్లోంచి గెంటేశారని పంకజ్ వాపోయాడు.
బుధవారం ఉదయం ఛతర్పూర్లోని పీఎన్బీ బ్యాంక్ సమీపంలోని అద్దె ఇంట్లో ఈ ఘటన జరిగినట్లు సమాచారం. భార్య, ఆమె సోదరుడు కలిసి తనపై విచక్షణారహితంగా దాడి చేశారని పంకజ్ ఆరోపించాడు. కర్రతో కొట్టడంతో తలకు బలమైన గాయమైందని, తన మొబైల్ ఫోన్ను నేలకేసి పగలగొట్టి ఇంట్లోంచి నెట్టివేశారని అతడు తెలిపాడు. గాయపడిన పంకజ్ ప్రస్తుతం ఛతర్పూర్ జిల్లా ఆసుపత్రిలో చికిత్స పొందుతున్నాడు.
ప్రస్తుతానికి ఈ వ్యవహారంలో భర్త చేసిన ఆరోపణలు మాత్రమే వెలుగులోకి వచ్చాయి; భార్య లేదా ఆమె కుటుంబ సభ్యుల వివరణ ఇంకా రాలేదు. అందిన ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు. ఇరువర్గాలను విచారించి లభించిన ఆధారాల ప్రకారం తదుపరి చట్టపరమైన చర్యలు తీసుకోనున్నట్లు పోలీసులు వెల్లడించారు.