స్టాక్ మార్కెట్, మ్యూచువల్ ఫండ్స్ (SIP) వంటి ఆధునిక పెట్టుబడులేవీ లేకుండా, కేవలం మట్టితో చేసిన హుండీలో పైసా పైసా కూడబెట్టి 29 ఏళ్ల యువతి సొంతంగా భూమి కొనుగోలు చేసి అందరినీ ఆశ్చర్యపరిచింది.
ఉత్తరప్రదేశ్‌కు చెందిన దీక్షా జైస్వాల్ అనే యువతి పట్టుదల, ఆమె పొదుపు సాధించిన విజయం గురించిన వార్త ప్రస్తుతం సోషల్ మీడియాలో వైరల్ అవుతోంది.
2017లో తన అక్క పెళ్లయినప్పుడు, మహిళలకు అంటూ సొంతంగా ఒక ఇల్లు లేదా స్థలం ఉండాలనే ఆలోచన దీక్షకు వచ్చింది. అంతకుముందు 2012లో తండ్రి రోడ్డు ప్రమాదానికి గురికావడంతో కుటుంబం తీవ్ర ఆర్థిక సంక్షోభంలో పడింది. ఆ సమయంలో గ్రామంలోని పిల్లలకు ట్యూషన్లు చెబుతూనే ఆమె తన చదువును పూర్తి చేసుకుంది. అనంతరం వ్యాయామ ఉపాధ్యాయురాలిగా (పీఈటీ) పనిచేస్తూ బీకాం, ఎంకాం, బీపీఈడీ డిగ్రీలను పూర్తి చేసింది.
నేటి కాలంలో డబ్బు ఆదా చేయడానికి అనేక మార్గాలు ఉన్నప్పటికీ, స్టాక్ మార్కెట్ వంటి సంక్లిష్టమైన అంశాలు తెలియకపోవడంతో దీక్ష తనకు తెలిసిన సాంప్రదాయ మార్గాన్నే ఎంచుకుంది. ప్రతి నెలా తన సంపాదనలో కొంత మొత్తాన్ని క్రమం తప్పకుండా మట్టి హుండీలు, గుడ్డ సంచుల్లో దాచిపెట్టేది; మరికొంత భాగాన్ని చిన్న చిన్న బంగారు నాణేల రూపంలో దాచడం మొదలుపెట్టింది. ఎలాంటి విరామం లేకుండా వరుసగా 9 ఏళ్ల పాటు ఈ పొదుపు అలవాటును ఒక నియమంలా కొనసాగించింది.
దీర్ఘకాలిక ఆర్థిక క్రమశిక్షణ తర్వాత, జూలై 2026లో తన 29వ ఏట ఆ మట్టి హుండీలు, దాచుకున్న పొదుపు మొత్తాన్ని తెరిచి చూడగా.. స్థలం కొనడానికి సరిపడా మొత్తం సమకూరింది. 9 సంవత్సరాలుగా రూపాయి రూపాయి కూడబెట్టిన సొమ్ముతో తన సొంత పేరు మీదే ప్లాట్ కొనుగోలు చేసి, తన చిరకాల కలను సాకారం చేసుకుంది.
‘హ్యూమన్స్ ఆఫ్ బాంబే’ (Humans of Bombay) వేదికగా వెలుగులోకి వచ్చిన దీక్ష కథను చూసిన నెటిజన్లు ఆమె ఆర్థిక క్రమశిక్షణను, కష్టపడే తత్వాన్ని ఎంతగానో ప్రశంసిస్తున్నారు. “భూమి విస్తీర్ణం ఎంతనేది ముఖ్యం కాదు, స్వశక్తితో సంపాదించుకున్న ఆత్మగౌరవమే గొప్పది”, “ప్రతి మహిళకూ ఇలాంటి ఆర్థిక స్వాతంత్ర్యం ఎంతో అవసరం” అంటూ నెటిజన్లు ప్రశంసల వర్షం కురిపిస్తున్నారు.