దేశ రాజధాని ఢిల్లీలోని చారిత్రక జంతర్ మంతర్ వద్ద చీఫ్ ఎలక్షన్ కమిషనర్ జ్ఞానేశ్ కుమార్‌కు వ్యతిరేకంగా జరిగిన ఆందోళనను కవర్ చేస్తున్న ముగ్గురు మహిళా జర్నలిస్టుల పట్ల పోలీసులు వ్యవహరించిన తీరుపై తీవ్ర ఆరోపణలు వెల్లువెత్తాయి.
ఆందోళన ప్రాంతంలో మహిళా పోలీసులు లేకపోవడంతో.. తమ విధుల్లో భాగంగా ప్రశ్నలు అడుగుతున్న సమయంలో అక్కడ భద్రతా విధుల్లో ఉన్న ఏసీపీ వివేక్ భగత్ తమను అనుచితంగా తాకడంతో పాటు, అసభ్యంగా పక్కకు నెట్టివేశారని బాధిత మహిళా జర్నలిస్టులు ఆరోపించారు.
ఈ ఘటనపై ఫిర్యాదు చేసేందుకు వారు పోలీస్ స్టేషన్‌కు వెళ్లినప్పటికీ.. వెంటనే కేసు నమోదు చేయకుండా పోలీసులు జాప్యం చేశారన్న ఆరోపణలు కూడా వచ్చాయి.
ఈ ఘటనకు సంబంధించిన వార్తలు దేశవ్యాప్తంగా తీవ్ర చర్చకు దారితీయడంతో పోలీసు ఉన్నతాధికారులు స్పందించారు. మహిళా జర్నలిస్టులు చేసిన ఫిర్యాదుల తీవ్రతను పరిగణనలోకి తీసుకుని.. ఈ వ్యవహారంపై సమగ్ర దర్యాప్తును ఢిల్లీ పోలీసుల క్రైమ్ బ్రాంచ్‌కు అప్పగించినట్లు సమాచారం.
అంతేకాకుండా, ఆరోపణలు ఎదుర్కొంటున్న ఏసీపీ వివేక్ భగత్ పదోన్నతి ప్రక్రియను కూడా తాత్కాలికంగా నిలిపివేసినట్లు తెలుస్తోంది. దర్యాప్తులో ఆరోపణలు నిజమని తేలితే తదుపరి కఠిన చర్యలు తీసుకునే అవకాశం ఉందని సమాచారం.
ఈ చర్యను బాధిత మహిళా జర్నలిస్టులకు లభించిన ప్రాథమిక న్యాయంగా కొందరు అభివర్ణిస్తున్నారు. అయితే దర్యాప్తు పూర్తయి బాధ్యులపై కఠిన చర్యలు తీసుకునే వరకు తమ పోరాటం కొనసాగుతుందని పలు సంఘాలు చెబుతున్నాయి.
దేశ ప్రజాస్వామ్యానికి నాలుగో స్తంభంగా భావించే మీడియా రంగానికి చెందిన మహిళా జర్నలిస్టులకే దేశ రాజధానిలో భద్రత లేకపోవడంపై జర్నలిస్టు సంఘాలు, మీడియా సంస్థలు తీవ్ర ఆందోళన వ్యక్తం చేస్తున్నాయి.
ఈ వ్యవహారంపై పక్షపాతం లేకుండా వేగంగా దర్యాప్తు జరిపి, ఆరోపణలు నిజమని తేలితే బాధ్యుడైన అధికారిపై కఠినమైన చట్టపరమైన చర్యలు తీసుకోవాలని ప్రజలు, సామాజిక కార్యకర్తలు డిమాండ్ చేస్తున్నారు.