ఛత్తీస్‌గఢ్ రాష్ట్రంలోని జాంజ్‌గిర్-చంపా జిల్లాలో ఒక ఏటీఎం కేంద్రంలో మహిళా ఉద్యోగులపై రసాయనాన్ని చల్లి, 50,000 రూపాయలను దుండగులు దోచుకెళ్లిన ఘటన తీవ్ర కలకలం సృష్టించింది.
ఘటన వివరాలు: అకల్తారా ప్రాంతంలోని పంజాబ్ నేషనల్ బ్యాంక్ ఏటీఎం కేంద్రంలో ఉద్యోగులు నగదును నింపుతుండగా ఈ సాహసోపేతమైన దోపిడీ జరిగింది. ముఖానికి మాస్కులు ధరించి వచ్చిన దొంగలు, అక్కడ ఉన్న ఇద్దరు మహిళా ఉద్యోగులు మరియు సెక్యూరిటీ గార్డుపై అకస్మాత్తుగా మిరియాల పొడి (పెప్పర్ స్ప్రే) కలిపిన రసాయనాన్ని చల్లారు. దీనివల్ల వారు కళ్లు కనపడక, ఊపిరి ఆడక ఇబ్బంది పడుతుండగా.. ఆ గ్యాప్‌లో టేబుల్‌పై ఉన్న రూ. 50,000 నగదును తీసుకుని దొంగలు పరారయ్యారు.
వైరల్ వీడియో: ఈ దోపిడీ ఉదంతం మొత్తం ఏటీఎం కేంద్రంలోని సీసీటీవీ కెమెరాలో రికార్డు అయ్యింది. రసాయన దాడికి గురైన ఒక మహిళా ఉద్యోగి ప్రాణ భయంతో బయటకు పరుగెత్తడం, దొంగలు మోటార్ సైకిల్‌పై పారిపోవడం ఆ వీడియోలో కనిపిస్తుంది. పట్టపగలే జరిగిన ఈ ఘటన స్థానికులను భయాందోళనకు గురిచేసింది. ప్రస్తుతం పోలీసులు ఈ ఘటనపై కేసు నమోదు చేసి, సీసీటీవీ ఫుటేజ్ ఆధారంగా నిందితుల కోసం గాలిస్తున్నారు.