తమిళనాడు, తిరుపూర్: ఇన్స్టాగ్రామ్ స్నేహితుడితో కలిసి కూతురు పారిపోయిందనే కోపంతో, ఒక తండ్రి ఆమెను కత్తితో గొంతు కోసి దారుణంగా హత్య చేశాడు. మధురైకి చెందిన ఆరుముగం అనే వ్యక్తి ప్రస్తుతం తిరుపూర్‌లో నివసిస్తున్నాడు. అతని కుమార్తె సిమ్య (22) ఈ హత్యకు గురైంది.
అసలేం జరిగిందంటే?
సిమ్యకు ఇప్పటికే వివాహమై, రెండు ఏళ్ల వయసున్న చిన్నారి కూడా ఉంది. అయితే, ఆమెకు ఎక్కువ సమయం సెల్‌ఫోన్ చూసే అలవాటు ఉండటంతో భర్తతో తరచూ గొడవలు జరుగుతుండేవి. ఈ క్రమంలో, ఇన్స్టాగ్రామ్ ద్వారా పరిచయమైన ఒక వ్యక్తితో కలిసి సిమ్య కన్యాకుమారికి పారిపోయింది. పోలీసులు ఆమెను కనిపెట్టి, తీసుకువచ్చి తల్లిదండ్రులకు అప్పగించారు.
దారుణ హత్య:
కూతురు చేసిన పని వల్ల సమాజంలో తన తలవంపులు కలిగాయని, పరువు పోయిందని ఆరుముగం తీవ్ర ఆవేదనకు లోనయ్యాడు. ఇంట్లో ఎవరూ లేని సమయంలో, కసాయివాడు మేకను కోసినట్లుగా.. కూతురి గొంతు కోసి, శరీరంపై విచక్షణారహితంగా పొడిచి చంపేశాడు.
హత్య చేసిన తర్వాత, రక్తపు మడుగులో పడి ఉన్న కూతురి శవం పక్కనే కూర్చుని ఆరుముగం పెద్దగా ఏడవడం మొదలుపెట్టాడు. బయటకు వెళ్లిన అతని భార్య, మనవడు తిరిగి వచ్చి చూసేసరికి.. ఇల్లంతా రక్తసిక్తంగా మారి ఉండటం, సిమ్య శవమై పడి ఉండటం చూసి షాక్‌కు గురయ్యారు.
నేర ఒప్పుకోలు:
సమాచారం అందుకున్న పోలీసులు ఆరుముగంను అరెస్ట్ చేశారు. విచారణలో అతను మాట్లాడుతూ.. “నా పరువు పోయింది, ఇక బయట ఎలా తిరగగలను? ఆ కోపంతోనే చంపేశాను” అని భీతిగొల్పే వాంగ్మూలం ఇచ్చాడు.
ఒక సెల్‌ఫోన్ పరిచయం, తీసుకున్న తప్పుడు నిర్ణయం.. ఒక నిండు ప్రాణాన్ని తీయడమే కాకుండా, ఒక కుటుంబాన్ని ఛిన్నాభిన్నం చేసింది. కన్నతండ్రిని జైలు పాలు చేసిన ఈ ఘటన ఆ ప్రాంతంలో తీవ్ర విషాదాన్ని మరియు సంచలనాన్ని నింపింది.