ఇస్లామాబాద్: పాకిస్థాన్ ప్రధాని షెబాజ్ షరీఫ్ అమెరికా అధ్యక్షుడు డొనాల్డ్ ట్రంప్‌ను ప్రసన్నం చేసుకోవడానికి ఎన్ని ప్రయత్నాలు చేసినా ఫలితం దక్కలేదు. భారత్ కంటే పాకిస్థాన్‌పై అమెరికా ఎక్కువ పన్నులు విధించడంతో, అక్కడి ప్రతిపక్ష పార్టీలు షరీఫ్ ప్రభుత్వాన్ని టార్గెట్ చేయడం మొదలుపెట్టాయి. సోషల్ మీడియాలో కూడా పాకిస్థానీయులు తమ ప్రధానిని ఎగతాళి చేస్తూ పోస్టులు పెడుతున్నారు.
భారత్ సాధించిన విజయం: భారత్-అమెరికా మధ్య జరిగిన వాణిజ్య ఒప్పందంతో గతంలో 50 శాతంగా ఉన్న సుంకం ఇప్పుడు 18 శాతానికి తగ్గింది. దీనివల్ల భారతీయ ఉత్పత్తులు అమెరికాకు భారీగా ఎగుమతి అయ్యే అవకాశం ఉంది. ఇది భారత పారిశ్రామిక రంగానికి పెద్ద ఊరటనిస్తుందని నిపుణులు చెబుతున్నారు.
పాకిస్థాన్ పరిస్థితి ఏంటి? చైనా మరియు పాకిస్థాన్ కంటే తక్కువ పన్ను రేటుతో అమెరికా భారత్‌తో ఒప్పందం కుదుర్చుకుంది. పాకిస్థాన్ ఉత్పత్తులపై అమెరికా 19 శాతం దిగుమతి పన్ను విధించింది. భారత్ కంటే ఇది ఒక శాతం ఎక్కువ. భారత్ సాధించిన ఈ దౌత్య విజయం ఇప్పుడు పాక్ ప్రధాని షెబాజ్ షరీఫ్‌కు తలనొప్పిగా మారింది.
పిలవని పేరంటంలా..: డొనాల్డ్ ట్రంప్‌కు మద్దతు తెలపడంలో షెబాజ్ షరీఫ్ అతిగా వ్యవహరించారని విమర్శలు వస్తున్నాయి. ట్రంప్‌కు నోబెల్ బహుమతి ఇవ్వాలని కోరడం నుండి, గాజా శాంతి మండలిలో చేరడం వరకు అమెరికాను ప్రసన్నం చేసుకోవడానికి ఆయన చేయని ప్రయత్నం లేదు. అయినా కూడా, పన్నుల విషయంలో భారత్ కంటే వెనుకబడి ఉండటం ఆయన అసమర్థతకు నిదర్శనమని పాక్ ప్రతిపక్షాలు మండిపడుతున్నాయి.
ఘాటైన విమర్శలు: పాకిస్థాన్‌కు చెందిన ఉమర్ అలీ అనే వ్యక్తి ఎక్స్‌లో స్పందిస్తూ, “అమెరికా మన దగ్గర అన్ని పనులు చేయించుకుని, తీరా ఫలితం ఇచ్చేటప్పుడు మాత్రం మనల్ని పట్టించుకోలేదు” అని ఎద్దేవా చేశారు. ఇమ్రాన్ ఖాన్ పార్టీ (PTI) కూడా షెబాజ్ ప్రభుత్వంపై విరుచుకుపడింది. భారత్ తన దేశ ఆర్థిక ప్రయోజనాల కోసం చర్చలు జరిపితే, పాక్ నాయకత్వం కేవలం తమ వ్యక్తిగత ప్రయోజనాల కోసమే అమెరికాతో మాట్లాడిందని వారు ఆరోపించారు.
ఆర్థిక సంక్షోభం మరింత తీవ్రం: పాకిస్థాన్ జర్నలిస్ట్ అసద్ తూర్ మాట్లాడుతూ, “ఈ పన్నుల నిర్ణయం పాకిస్థాన్ ఆర్థిక సమస్యలను మరింత పెంచుతుంది. ఎగుమతులు తగ్గడం, విదేశీ పెట్టుబడులు రాకపోవడం వల్ల అంతర్జాతీయ స్థాయిలో పాకిస్థాన్ బేరసారాలు ఆడే శక్తిని పూర్తిగా కోల్పోయిందని ఇది నిరూపిస్తోంది” అని పేర్కొన్నారు.