శుక్రవారం ఇస్లామాబాద్‌లోని ఒక మసీదులో జరిగిన ఘోర ఆత్మాహుతి దాడిని భారత్ తీవ్రంగా ఖండించింది. బాధితులకు మరియు వారి కుటుంబాలకు ప్రగాఢ సానుభూతిని తెలియజేసింది. అదే సమయంలో, ఈ దాడికి బాహ్య శక్తులే కారణమంటూ పాకిస్థాన్ చేస్తున్న ఆరోపణలను న్యూఢిల్లీ గట్టిగా తిప్పికొట్టింది. ఇవి నిరాధారమైన మరియు పనికిరాని ఆరోపణలని భారత్ స్పష్టం చేసింది.
భారత విదేశాంగ శాఖ (MEA) ప్రకటన: “ఇస్లామాబాద్ మసీదులో జరిగిన పేలుడు ఖండించదగినది. ఈ ఘటనలో ప్రాణాలు కోల్పోయిన వారి కుటుంబాలకు భారత్ సంతాపం తెలుపుతోంది. అయితే, పాకిస్థాన్ తన సామాజిక వ్యవస్థను పట్టిపీడిస్తున్న అంతర్గత సమస్యలను పరిష్కరించుకోకుండా, తన సొంత తప్పిదాలకు ఇతరులపై నిందలు వేస్తూ తనను తాను వంచించుకోవడం (delude) దురదృష్టకరం” అని భారత విదేశాంగ మంత్రిత్వ శాఖ ఒక ప్రకటనలో తెలిపింది.
ఘటన నేపథ్యం: పాకిస్థాన్ రాజధాని ఇస్లామాబాద్‌లోని తర్లాయ్ ప్రాంతంలో ఉన్న ‘ఖదీజా అల్ కుబ్రా’ షియా మసీదులో శుక్రవారం ప్రార్థనల సమయంలో ఈ దాడి జరిగింది. ఈ భీకర పేలుడులో సుమారు 70 మంది మరణించగా, 200 మందికి పైగా గాయపడ్డారు. ఆత్మాహుతి దాడికి పాల్పడిన వ్యక్తిని మసీదు ప్రవేశ ద్వారం వద్ద అడ్డుకున్నప్పటికీ, అతను తన వద్ద ఉన్న పేలుడు పదార్థాలను పేల్చుకున్నట్లు సమాచారం.