ప్రధాన వార్త: ప్రముఖ ఏఐ సంస్థ ‘ఆంథ్రోపిక్’ (Anthropic) విడుదల చేసిన కొత్త క్లాడ్ వెర్షన్ సాఫ్ట్‌వేర్ ప్రపంచాన్ని దిగ్భ్రాంతికి గురిచేసింది. ఈ ఒక్క అప్‌డేట్ వల్ల సిలికాన్ వ్యాలీ నుంచి బెంగళూరు ఐటీ పార్కుల వరకు ప్రకంపనలు మొదలయ్యాయి. దశాబ్దాలుగా ఐటీ రంగంలో ఏకచ్ఛత్రాధిపత్యం చలాయిస్తున్న మైక్రోసాఫ్ట్, అడోబ్, సేల్స్‌ఫోర్స్ వంటి సంస్థల మార్కెట్ విలువ భారీగా పడిపోతోంది.
ఎవరీ రాహుల్ పాటిల్? ఈ విప్లవం వెనుక ఉన్నది బెంగళూరుకు చెందిన రాహుల్ పాటిల్. ఆయన ప్రస్తుతం ఆంథ్రోపిక్ సంస్థకు చీఫ్ టెక్నాలజీ ఆఫీసర్ (CTO)గా వ్యవహరిస్తున్నారు. గతంలో మైక్రోసాఫ్ట్, అమెజాన్ వంటి సంస్థల్లో పనిచేసిన అనుభవం ఉన్న పాటిల్, అక్టోబర్ 2025లో ఆంథ్రోపిక్ బాధ్యతలు చేపట్టాక ఏఐ దిశనే మార్చేశారు. ఆయన ప్రవేశపెట్టిన ‘పాటిల్ ఎఫెక్ట్’ ఇప్పుడు ప్రపంచవ్యాప్తంగా చర్చనీయాంశమైంది. ఖరీదైన హార్డ్‌వేర్ అవసరం లేకుండా, తక్కువ ఖర్చుతో అత్యంత శక్తివంతమైన ఏఐ ఫలితాలను ఎలా సాధించవచ్చో ఆయన నిరూపించారు.
ఐటీ కంపెనీల షేర్లు ఎందుకు కుప్పకూలాయి? క్లాడ్ ఇప్పుడు కేవలం ప్రశ్నలకు సమాధానమిచ్చే చాట్‌బాట్ మాత్రమే కాదు, అదొక డిజిటల్ ఉద్యోగి.
- కోడింగ్ మాంత్రికుడు: సాఫ్ట్‌వేర్ ఇంజనీర్లు రోజులు తరబడి చేసే కోడింగ్ పనిని ఇది నిమిషాల్లో పూర్తి చేస్తోంది.
- మధ్యవర్తుల తొలగింపు: గతంలో కంపెనీలు సాఫ్ట్‌వేర్ ప్రాజెక్టుల కోసం ఇన్ఫోసిస్ లేదా టీసీఎస్ వంటి సంస్థలపై ఆధారపడేవి. ఇప్పుడు ఏఐ ఏజెంట్లు నేరుగా ఆ పనులు చేస్తుండటంతో, ఐటీ సేవా సంస్థల ఆదాయానికి గండి పడుతోంది. దీని ప్రభావంతో వాల్ స్ట్రీట్ నుంచి దలాల్ స్ట్రీట్ వరకు ఐటీ షేర్లు కుప్పకూలాయి. ఇన్ఫోసిస్, టీసీఎస్ వంటి సంస్థలు దాదాపు 7% నష్టాన్ని చవిచూశాయి.
బెంగళూరుకు ఆంథ్రోపిక్ రాక: రాహుల్ పాటిల్ తన సొంత నగరాన్ని మర్చిపోలేదు. టోక్యో తర్వాత ప్రపంచంలోనే రెండో అతిపెద్ద కార్యాలయాన్ని ఆంథ్రోపిక్ సంస్థ బెంగళూరులో ప్రారంభించబోతోంది. భారత్‌ను ఏఐ రాజధానిగా మార్చడమే తన లక్ష్యమని ఆయన పేర్కొన్నారు.