కేంద్ర ప్రభుత్వం ఏప్రిల్ 1 నుండి పాన్ కార్డ్ నిబంధనలలో కొన్ని కీలక మార్పులను తీసుకురానుంది. బ్యాంకింగ్ లావాదేవీల నుండి ఆస్తి కొనుగోళ్ల వరకు పాన్ కార్డ్ ఎక్కడ అవసరమవుతుందో వివరిస్తూ కొత్త మార్గదర్శకాలను విడుదల చేసింది.
ముఖ్యమైన మార్పులు ఇవే:
- బ్యాంకు లావాదేవీలు: ప్రస్తుతం రోజుకు ₹50 వేల కంటే ఎక్కువ డిపాజిట్ చేసినా లేదా విత్ డ్రా చేసినా పాన్ కార్డ్ అవసరమయ్యేది. అయితే కొత్త నిబంధన ప్రకారం, ఒక ఆర్థిక సంవత్సరంలో మీ మొత్తం లావాదేవీలు ₹10 లక్షలు దాటితేనే పాన్ కార్డు సమర్పించడం తప్పనిసరి.
- వాహనాల కొనుగోలు: ఇకపై ₹5 లక్షల కంటే ఎక్కువ విలువైన వాహనాలను కొనుగోలు చేసేటప్పుడు మాత్రమే పాన్ కార్డ్ అవసరమవుతుంది. అంతకంటే తక్కువ ధర ఉన్న వాహనాలకు ఇది అవసరం లేదు.
- ఆస్తి లావాదేవీలు: గతంలో ఆస్తి కొనుగోలు లేదా విక్రయాలకు ₹10 లక్షల పరిమితి ఉండేది. దానిని ఇప్పుడు ₹20 లక్షలకు పెంచారు. అంటే ₹20 లక్షల కంటే ఎక్కువ విలువైన ఆస్తులకు మాత్రమే పాన్ నంబర్ అవసరం.
- భీమా (Insurance): ఇన్సూరెన్స్ రంగంలో నిబంధనలు కఠినతరం చేశారు. ఏప్రిల్ 1 నుండి మీరు ఎంత తక్కువ మొత్తానికి ఇన్సూరెన్స్ పాలసీ తీసుకున్నా సరే, పాన్ నంబర్ ఇవ్వడం తప్పనిసరి.
- రెస్టారెంట్ బిల్లులు: హోటళ్లు లేదా రెస్టారెంట్లలో బిల్లు ₹1 లక్ష దాటితేనే పాన్ కార్డ్ అడుగుతారు (గతంలో ఇది ₹50 వేలుగా ఉండేది).
కొత్త పాన్ కార్డ్ పొందడం ఎలా? కొత్తగా పాన్ కార్డ్ కావాలనుకునే వారు ఆదాయపు పన్ను శాఖ వెబ్‌సైట్ (e-Filing Portal) ద్వారా ఆధార్ నంబర్ ఉపయోగించి కేవలం 10 నిమిషాల్లో ‘ఇన్‌స్టంట్ ఈ-పాన్’ ఉచితంగా పొందవచ్చు. ఫిజికల్ కార్డ్ (ప్లాస్టిక్ కార్డ్) కావాలనుకునే వారు NSDL లేదా UTIITSL వెబ్‌సైట్ల ద్వారా సుమారు ₹107 చెల్లించి దరఖాస్తు చేసుకోవచ్చు.