మనలో చాలామందికి ఉదయం లేవగానే ఒక కప్పు వేడి టీ లేదా కాఫీ తాగడం అలవాటు. అయితే, పాలు మరియు చక్కెర కలిపిన టీకి బదులుగా, ఔషధ గుణాలున్న వెల్లుల్లితో టీ తయారు చేసుకుని తాగడం వల్ల ఆరోగ్యానికి ఎంతో మేలు జరుగుతుంది.
వెల్లుల్లి టీ ప్రయోజనాలు: వెల్లుల్లిలోని ‘అల్లిసిన్’ (Allicin) అనే రసాయనం దీనికి ఔషధ శక్తిని ఇస్తుంది. వెల్లుల్లిని నలిపినప్పుడు మాత్రమే అల్లిసిన్ విడుదలవుతుంది. ఇది సహజమైన యాంటీబయాటిక్‌గా పనిచేసి శరీరంలోని బ్యాక్టీరియా, వైరస్‌లను నాశనం చేస్తుంది.
- గుండె ఆరోగ్యం: ప్రతిరోజూ ఒక కప్పు వెల్లుల్లి టీ తాగడం వల్ల రక్తంలోని చెడు కొలెస్ట్రాల్ తగ్గుతుంది, రక్త ప్రసరణ మెరుగుపడి రక్తపోటు (BP) నియంత్రణలో ఉంటుంది. దీనివల్ల గుండెపోటు వచ్చే ప్రమాదం తగ్గుతుంది.
- రోగనిరోధక శక్తి: జలుబు, దగ్గు, గొంతు నొప్పిని తగ్గించి శరీరంలో రోగనిరోధక శక్తిని పెంచుతుంది. శీతాకాలంలో దీనిని పరగడుపున తాగడం చాలా మంచిది.
- బరువు తగ్గుదల: ఇది శరీరంలో మెటబాలిజంను పెంచి అనవసరమైన కొవ్వును కరిగిస్తుంది. జీర్ణ సమస్యలు, గ్యాస్ మరియు కడుపు ఉబ్బరాన్ని కూడా తగ్గిస్తుంది.
తయారు చేసే విధానం:
- 2-3 వెల్లుల్లి రెబ్బలను వలిచి బాగా నలపాలి.
- అల్లిసిన్ ఏర్పడటానికి నలిపిన వెల్లుల్లిని 10 నిమిషాల పాటు గాలిలో ఉంచాలి.
- ఒక గ్లాసు నీటిని మరిగించి, అందులో నలిపిన వెల్లుల్లిని వేయాలి.
- స్టవ్ ఆపి, మూత పెట్టి 5 నిమిషాలు ఉంచాలి.
- ఆ తర్వాత వడకట్టి, కొద్దిగా నిమ్మరసం, ఒక స్పూన్ తేనె కలిపి గోరువెచ్చగా తాగాలి.
ఎవరు జాగ్రత్తగా ఉండాలి?: వెల్లుల్లి టీ మంచిదే అయినా అతిగా తాగకూడదు. ఎక్కువగా తాగితే గుండెల్లో మంట, కడుపులో అల్సర్లు రావచ్చు. ముఖ్యంగా సర్జరీ చేయించుకోబోయే వారు, రక్తం పల్చబడటానికి మందులు వాడేవారు, గర్భిణీలు డాక్టర్ సలహా లేకుండా దీనిని తాగకూడదు.