ఒక నిశ్శబ్ద రాత్రి, ఢాకా విమానాశ్రయం మరియు ఒక అనుమానాస్పద పాస్‌పోర్ట్.. ఈ మూడు కలిసి భారతదేశపు అత్యంత ప్రమాదకరమైన ఉగ్రవాద సంస్థ ‘ఇండియన్ ముజాహిదీన్’ అంతానికి నాంది పలికాయి. శత్రువు చేసిన ఒక చిన్న తప్పు భారతీయ గూఢచారులకు అతిపెద్ద ఆయుధంగా ఎలా మారిందో తెలిపే ఈ కథనం ఏదో బాలీవుడ్ థ్రిల్లర్ సినిమాను తలపిస్తుంది.
పాకిస్థాన్ నిఘా సంస్థ ISI తన ఏజెంట్ జియా-ఉర్-రెహ్మాన్ (వకాస్)ను నేపాల్ మీదుగా పాకిస్థాన్‌కు పంపాలని ప్లాన్ చేసింది. కానీ, భారత నిఘా సంస్థ RAW కళ్లు అప్పటికే అతనిపై ఉన్నాయని వారు ఊహించలేకపోయారు.
వేటగాడే ‘ఎర’గా మారిన వేళ: ఏప్రిల్ 2014లో ఢాకా ఎయిర్‌పోర్ట్‌లో వకాస్ పాస్‌పోర్ట్‌ను తనిఖీ చేస్తున్నప్పుడు, దానిపై ఎంట్రీ స్టాంప్ లేకపోవడాన్ని అక్కడే మారువేషంలో ఉన్న ఒక RAW అధికారి గమనించారు. మెరుపు వేగంతో అతని ఫోటో తీసి ఢిల్లీలోని ప్రధాన కార్యాలయానికి పంపారు. నిమిషాల్లో అతని గుర్తింపు వకాస్‌గా నిర్ధారణ అయ్యింది.
భారతీయ ఏజెంట్లు ఎటువంటి హడావుడి చేయకుండా అతడిని బంగ్లాదేశ్ నుండి రహస్యంగా భారత్‌కు తీసుకువచ్చారు. అతడిని అరెస్ట్ చేసినట్లు ప్రకటించకుండా, మిగతా ఉగ్రవాదులను పట్టించే ‘ఎర’ (Bait) గా వాడాలని నిర్ణయించుకున్నారు. వకాస్ తన హ్యాండ్లర్ తెహసీన్ అక్తర్ (మోను)తో ఆన్‌లైన్ చాటింగ్ కొనసాగించేలా చేసి, ఎవరికీ అనుమానం రాకుండా జాగ్రత్త పడ్డారు.
నేపాల్ సరిహద్దులో ఆఖరి మజిలీ: నిఘా వర్గాల అసలు వ్యూహం అప్పుడు మొదలైంది. వకాస్ ద్వారా తెహసీన్‌ను నేపాల్‌లో ముఖాముఖి కలిసేలా ఒప్పించారు. భారతీయ గూఢచారులు ఎంతో ఓపికతో ఆ మీటింగ్ స్పాట్‌ను చుట్టుముట్టారు. తెహసీన్ అక్కడికి చేరుకోగానే, స్థానిక అధికారుల సహాయంతో అతడిని దొరకబట్టారు. ఆ తర్వాత అతడిని రహస్యంగా భారత సరిహద్దులోకి తీసుకువచ్చి అధికారికంగా అరెస్ట్ చూపించారు. గూఢచారి చరిత్రలో ఇదొక అద్భుతమైన ఆపరేషన్‌గా నిలిచిపోయింది.
యూనానీ డాక్టర్‌గా మారిన యాసిన్ భత్కల్ అంతం: దీనికి ముందే, ఆగస్టు 2013లో ఇండియన్ ముజాహిదీన్ వ్యవస్థాపకుడు యాసిన్ భత్కల్‌ను పట్టుకోవడం ద్వారా ఆ సంస్థ వెన్నుముకను ఏజెన్సీలు విరిచేశాయి. యాసిన్ నేపాల్‌లోని పోఖారాలో ఒక ‘యూనానీ డాక్టర్’ అవతారంలో తలదాచుకున్నాడు. కేవలం దాడుల ప్లాన్ అమలు చేయడానికి మాత్రమే అతను భారత్‌లోకి ప్రవేశించేవాడు. నెలల తరబడి అతని కదలికలను గమనించిన భారత ఏజెంట్లు, చివరకు అతని సహచరుడు అసదుల్లా అక్తర్‌తో సహా అరెస్ట్ చేశారు. 200 మందికి పైగా అమాయకుల మరణానికి కారణమైన యాసిన్ పట్టుబడటం, ఆ సంస్థకు తగిలిన అతిపెద్ద దెబ్బ.