పిల్లల మనసు చాలా సున్నితమైనది. తల్లిదండ్రులు వారితో సరిగ్గా సంభాషించకపోతే, పిల్లలు తమ ప్రశ్నలకు సమాధానాల కోసం బయట వెతుకుతారు, ఇది ఒక్కోసారి చెడు అలవాట్లకు దారితీయవచ్చు. అందుకే, ప్రతిరోజూ రాత్రి పడుకునే ముందు తల్లిదండ్రులు తమ పిల్లలను ఈ 6 ప్రశ్నలు అడగాలని పేరెంటింగ్ కోచ్ సందీప్ సూచిస్తున్నారు.
నేటి ఉరుకుల పరుగుల జీవితంలో పిల్లలతో సంభాషణ కేవలం “హోంవర్క్ అయిపోయిందా?”, “భోజనం చేశావా?” అన్నంత వరకే పరిమితం అవుతోంది. కానీ, రాత్రి పడుకునే ముందు సమయం వారి భావోద్వేగ వికాసానికి చాలా ముఖ్యం.
ఆ 6 ప్రశ్నలు ఇవే:
1. “ఈరోజు నీకు అన్నిటికంటే ఎక్కువ సంతోషాన్ని ఇచ్చిన విషయం ఏది?” ఈ ప్రశ్న పిల్లల్లో సానుకూల దృక్పథాన్ని (Positivity) పెంచుతుంది. సంతోషం అంటే కేవలం పెద్ద విజయాలు లేదా ఖరీదైన బహుమతులే కాదు, స్నేహితులతో ఆడుకోవడం లేదా అమ్మ చేసిన వంటకం కూడా సంతోషాన్ని ఇస్తుందని వారు గ్రహిస్తారు. ఇది వారిలో ‘కృతజ్ఞత’ భావాన్ని పెంచుతుంది.
2. “ఈరోజు నీకు ఏదైనా సమస్య ఎదురైందా? దానిని నువ్వు ఎలా పరిష్కరించావు?” సవాళ్లను ఎదుర్కోవడం పిల్లలకు నేర్పించాలి. ఈ ప్రశ్న అడగడం వల్ల, సమస్యలు రావడం సహజమని, వాటిని ధైర్యంగా ఎదుర్కోవాలని వారికి అర్థమవుతుంది. వారి ‘ప్రాబ్లమ్ సాల్వింగ్’ (Problem Solving) నైపుణ్యాలు మెరుగుపడతాయి.
3. “ఈరోజు నువ్వు ఎవరికైనా సహాయం చేశావా? లేదా నీకు ఎవరైనా సహాయం చేశారా?” ఇది పిల్లల్లో దయ (Kindness), సానుభూతి (Empathy) వంటి మానవీయ విలువలను పెంచుతుంది. ఇతరులకు సహాయం చేయడంలో ఉండే తృప్తిని వారు అర్థం చేసుకుంటారు. అలాగే ఇతరులు చేసిన సహాయానికి ‘ధన్యవాదాలు’ చెప్పడం నేర్చుకుంటారు.
4. “ఈరోజు నీకు నచ్చని విషయం ఏది?” పిల్లల మనసులో ఉండే భయం, కోపం లేదా బాధను బయటకు తీయడానికి ఇది చాలా ముఖ్యం. స్కూల్లో ఎవరైనా ఏడిపించినా లేదా ఏదైనా ఇబ్బంది జరిగినా, వారు భయం లేకుండా మీతో చెప్పుకోగలుగుతారు. ఇది వారి మానసిక ఒత్తిడిని తగ్గిస్తుంది.
5. “ఈరోజు నువ్వు చేసిన ఏ పని వల్ల నీపై నీకు గర్వంగా అనిపించింది?” పిల్లల్లో ఆత్మవిశ్వాసాన్ని (Self-esteem) పెంచడానికి ఇది గొప్ప ప్రశ్న. వారు తమలోని సుప్త గుణాలను గుర్తించడం నేర్చుకుంటారు. “నేను ఇది చేయగలను” అనే నమ్మకం వారిలో పెరుగుతుంది.
6. “రేపటి కోసం నీ ప్లాన్ ఏంటి?” ఈ ప్రశ్న పిల్లల్లో క్రమశిక్షణ, బాధ్యతను పెంచుతుంది. కేవలం ఈరోజు మాత్రమే కాకుండా, రేపటి గురించి కూడా ఆలోచించడం, దానికి సిద్ధంగా ఉండటం వల్ల వారిలో నాయకత్వ లక్షణాలు (Leadership qualities) అభివృద్ధి చెందుతాయి.