ఇంగ్లీష్ లిటరేచర్ (ఆంగ్ల సాహిత్యం)లో పీహెచ్డీతో పాటు పలు పీజీ డిగ్రీలు పూర్తి చేసినప్పటికీ, కుటుంబ పేదరికం కారణంగా తమిళనాడుకు చెందిన ఒక ప్రొఫెసర్ పార్ట్ టైమ్గా టాక్సీ నడుపుతున్న దయనీయ స్థితి సోషల్ మీడియాలో తీవ్ర కలకలం రేపుతోంది.
చెన్నై ప్రెసిడెన్సీ కాలేజీలో కాంట్రాక్ట్ ప్రాతిపదికన లెక్చరర్గా పనిచేస్తున్న డాక్టర్ ఇ. తిరుమలై రాజా, నెలకు కేవలం రూ. 30,000 మాత్రమే జీతంగా పొందుతున్నారు.
అత్యున్నత విద్యా అర్హత, ఎన్నో ఏళ్ల బోధనా అనుభవం (Teaching Experience), పలు పరిశోధనా పత్రాలను (Research Papers) సమర్పించిన గుర్తింపు ఉన్నప్పటికీ.. అతనికి శాశ్వత ఉద్యోగం (Permanent Job) లభించకపోవడం అతని జీవనోపాధిని దెబ్బతీసింది.
రోజువారీ జీవన ఖర్చులు భరించలేక ఇబ్బంది పడుతున్న ఆయన, కాలేజీ సమయం ముగిసిన తర్వాత తన కుటుంబాన్ని పోషించుకోవడానికి తీవ్రంగా పోరాడుతున్నారు.
ఈ హృదయ విదారక సమాచారాన్ని ఇండియన్ రైల్వే అకౌంట్స్ సర్వీస్ (IRAS) సీనియర్ అధికారి అనంత్ రూపనగుడి తన ‘ఎక్స్’ (ట్విట్టర్) ఖాతాలో పంచుకున్నారు. అలాగే అతనికి ఒక శాశ్వత ఉపాధ్యాయ ఉద్యోగం వచ్చేలా సహాయం చేయాలని కోరారు.
అత్యున్నత విద్యను అభ్యసించినప్పటికీ, అర్హతకు తగ్గ ఉద్యోగం దొరకక ఒక ప్రొఫెసర్ టాక్సీ నడిపే పరిస్థితికి రావడం.. విద్యా రంగంలోని ప్రస్తుత దుస్థితికి అద్దం పడుతోందని విద్యావేత్తలు ఆవేదన వ్యక్తం చేస్తున్నారు.
ఆయన పడుతున్న ఈ కష్టానికి సంబంధించిన పోస్ట్ ఇంటర్నెట్లో చాలా మంది దృష్టిని ఆకర్షించగా.. అతనికి తగిన గౌరవప్రదమైన ఉద్యోగం లభించాలంటూ నెటిజన్లు పెద్ద ఎత్తున మద్దతు తెలుపుతున్నారు.