ప్రపంచవ్యాప్తంగా కాల్పుల విరమణ (Ceasefire) చేయిస్తానంటూ ‘సర్పంచ్’లా తిరుగుతున్న అమెరికా అధ్యక్షుడు డొనాల్డ్ ట్రంప్‌కు గట్టి ఎదురుదెబ్బ తగిలింది. రష్యా-ఉక్రెయిన్ యుద్ధాన్ని ఆపుతానంటూ ట్రంప్ చేసిన వాగ్దానాలు పుతిన్ పెట్టిన షరతుల ముందు ఫలించడం లేదు. ఈ క్రమంలో, ఉక్రెయిన్ అధ్యక్షుడు వోలోడిమిర్ జెలెన్‌స్కీ భారత్‌కు రాబోతుండటం ఇప్పుడు వైట్ హౌస్‌లో చర్చనీయాంశంగా మారింది.
మోదీ శాంతి మంత్రం – పుతిన్ సానుకూలత
ఇటీవల రష్యా అధ్యక్షుడు పుతిన్ భారత్‌లో పర్యటించిన సంగతి తెలిసిందే. ఆ సమయంలో ప్రధాని మోదీ మాట్లాడుతూ.. “ఉక్రెయిన్ యుద్ధం విషయంలో భారత్ తటస్థంగా లేదు, మేము శాంతి పక్షాన ఉన్నాం” అని స్పష్టం చేశారు. మోదీ ప్రకటనకు పుతిన్ కూడా సానుకూలంగా స్పందించారు. దీంతో, ఈ యుద్ధాన్ని ముగించగల సత్తా ఒక్క భారత్‌కే ఉందనే సంకేతాలు ప్రపంచవ్యాప్తంగా వెళ్లాయి.
భారతే ఏకైక మార్గమా?
ట్రంప్ కూడా ఆపలేకపోయిన ఈ యుద్ధాన్ని మోదీ ఎలా ఆపగలరనేది ఇప్పుడు ఆసక్తికరంగా మారింది. తాజాగా ఉక్రెయిన్ రాయబారి మాట్లాడుతూ.. జెలెన్‌స్కీ త్వరలో భారత్ పర్యటనకు రానున్నట్లు వెల్లడించారు. ఈ పర్యటన ద్వారా ఉక్రెయిన్ తన గొంతును భారత్‌కు మరింత స్పష్టంగా వినిపించగలదని ఆయన ఆశాభావం వ్యక్తం చేశారు.
జెలెన్‌స్కీ హెచ్చరిక – రష్యా భారీ దాడికి సిద్ధం?
మరోవైపు, రష్యా త్వరలోనే ఉక్రెయిన్‌పై పెను దాడికి సిద్ధమవుతోందని జెలెన్‌స్కీ తన తాజా వీడియోలో హెచ్చరించారు. “ప్రజలంతా అప్రమత్తంగా ఉండాలి, ఎయిర్ రైడ్ అలర్ట్‌లను ఏమాత్రం నిర్లక్ష్యం చేయవద్దు” అని ఆయన కోరారు. రష్యా ఈ స్థాయిలో విరుచుకుపడబోతున్న తరుణంలో, జెలెన్‌స్కీ భారత్ పర్యటనను ఖరారు చేసుకోవడం విశేషం. రష్యా దాడుల నుండి తమను కాపాడగల ఏకైక శక్తి భారత్ అని ఉక్రెయిన్ భావిస్తున్నట్లు కనిపిస్తోంది.
భారత్ ఎదుగుతున్న శక్తి
“భారత్ ఒక ఎదుగుతున్న ప్రపంచ శక్తి. ప్రస్తుత పరిస్థితుల్లో భారత్ వంటి దేశం తటస్థంగా ఉండటం కష్టం కావచ్చు, కానీ వారి శాంతి ప్రయత్నాలు మాకు కీలకం” అని ఉక్రెయిన్ రాయబారి పేర్కొన్నారు. ట్రంప్ ప్రయత్నాలు విఫలమవుతున్న వేళ, మోదీ ఏ వ్యూహంతో ఈ యుద్ధానికి ముగింపు పలకబోతున్నారనేది ఇప్పుడు మిలియన్ డాలర్ల ప్రశ్న.