న్యూయార్క్: స్టాక్ మార్కెట్‌లో పెట్టుబడి ఎలా పెట్టాలి, దానిని భారీ సంపదగా ఎలా మార్చుకోవాలో ప్రపంచానికి నేర్పించిన ఇన్వెస్ట్‌మెంట్ మాంత్రికుడు, ‘ఒరాకిల్ ఆఫ్ ఒమాహా’గా పేరుగాంచిన వారెన్ బఫెట్ (95) బర్క్‌షైర్ హాత్వే (Berkshire Hathaway) అధ్యక్ష పదవి నుండి తప్పుకున్నారు.
సుమారు 1 ట్రిలియన్ డాలర్ల (సుమారు ₹90 లక్షల కోట్లు) విలువ కలిగిన ఈ భారీ కంపెనీ బాధ్యతలు ఇప్పుడు బఫెట్ నమ్మకస్తుడైన గ్రెగ్ ఏబెల్ (Greg Abel) భుజాన పడ్డాయి.
సంక్షోభంలో ఉన్న టెక్స్‌టైల్ కంపెనీ నుండి గ్లోబల్ ఇన్వెస్ట్‌మెంట్ సంస్థ వరకు
1960వ దశకంలో నష్టాల్లో ఉన్న ‘బర్క్‌షైర్ హాత్వే’ అనే దుస్తుల తయారీ (Textile) కంపెనీ షేర్లను బఫెట్ కొనుగోలు చేశారు. తన అద్భుతమైన దూరదృష్టితో ఆ కంపెనీని ప్రపంచంలోనే అత్యంత విజయవంతమైన పెట్టుబడి సంస్థగా మార్చారు. 1985లో టెక్స్‌టైల్ వ్యాపారాన్ని పూర్తిగా నిలిపివేసి.. ఇన్సూరెన్స్, రైల్వే, టెక్నాలజీ వంటి రంగాల్లో పెట్టుబడులు పెట్టే హోల్డింగ్ కంపెనీగా దీనిని రూపాంతర పరిచారు.
చార్లీ ముంగర్ స్నేహం – విజయ రహస్యం
వారెన్ బఫెట్ విజయాల వెనుక ఆయన చిరకాల మిత్రుడు, భాగస్వామి చార్లీ ముంగర్ పాత్ర ఎంతో ఉంది. వీరిద్దరి బంధం కేవలం వ్యాపారానికే పరిమితం కాలేదు. బర్క్‌షైర్ హాత్వే నేడు ఈ స్థాయిలో ఉండటానికి ముంగర్ ఇచ్చిన సలహాలే కారణమని బఫెట్ ఎప్పుడూ గుర్తుచేసుకుంటారు.
కొత్త సారథి గ్రెగ్ ఏబెల్ ఎవరు?
గత 25 ఏళ్లుగా బర్క్‌షైర్ హాత్వేలో సేవలందిస్తున్న గ్రెగ్ ఏబెల్, 2000వ సంవత్సరంలో కంపెనీలో చేరారు. బర్క్‌షైర్ హాత్వే ఎనర్జీ విభాగాన్ని అమెరికాలోనే అతిపెద్ద విద్యుత్ సరఫరా సంస్థగా ఎదిగేలా చేయడంలో ఆయనది కీలక పాత్ర. గతేడాది జరిగిన వార్షిక సమావేశంలోనే బఫెట్ ఆయనను సీఈఓగా ప్రకటించారు. ఇకపై రైల్వే, రిటైల్ మరియు ఇంధన రంగాల వ్యవహారాలను ఏబెల్ పర్యవేక్షిస్తారు.
అజిత్ జైన్ భుజాన భీమా రంగం
ఇదే సమయంలో, బర్క్‌షైర్ హాత్వే యొక్క భీమా (Insurance) వ్యాపార బాధ్యతలను భారత సంతతికి చెందిన అజిత్ జైన్ (74) నిర్వహించనున్నారు. కంపెనీ వైస్ ఛైర్మన్‌గా ఉన్న ఆయనకు ఇన్సూరెన్స్ రంగంలో అపారమైన అనుభవం ఉంది.
బఫెట్ సక్సెస్ మంత్రాలు:
- సీస్ క్యాండీస్ (1972): కేవలం 25 మిలియన్ డాలర్లకు కొన్న ఈ కంపెనీ, 2019 నాటికి 2 బిలియన్ డాలర్ల లాభాన్ని తెచ్చిపెట్టింది. తక్కువ ధరలో దొరికే కంపెనీల కంటే, నాణ్యమైన మరియు నగదు ప్రవాహం (Cash flow) ఉన్న కంపెనీలను కొనడం మిన్న అని బఫెట్ నిరూపించారు.
- కోకాకోలా: 1980లలో ఆయన చేసిన ఈ పెట్టుబడి నేటికీ లాభాలను అందిస్తూనే ఉంది. దీనిని ఆయన ‘ఫరెవర్ స్టాక్’ (ఎప్పటికీ ఉండే షేరు) అని పిలుస్తారు.
యాపిల్ నుండి డ్యూరాసెల్ బ్యాటరీల వరకు.. బఫెట్ చేసిన పెట్టుబడులు ఎందరో ఇన్వెస్టర్లను కోటీశ్వరులను చేశాయి. ఇప్పుడు ఆయన నిష్క్రమణతో, ఈ గొప్ప వారసత్వాన్ని ముందుకు తీసుకెళ్లే బాధ్యత గ్రెగ్ ఏబెల్‌పై ఉంది.