జోడును దేవుడే నిర్ణయిస్తాడు’ అని అంటారు. ఈ మాటను నిజం చేసే ఒక ఆసక్తికరమైన ఘటన బీహార్లో చోటుచేసుకుంది. పెళ్లి ఒకరితో నిశ్చయమైతే, చివరి నిమిషంలో పెళ్లికొడుకు మారాల్సి వచ్చింది.
ఈ ఘటన సిగోడి పోలీస్ స్టేషన్ పరిధిలోని మొరార్చక్ గ్రామంలో జరిగింది. పెళ్లి మండపంలో పెళ్లికొడుకు కూర్చుని ఉండగా, ఆనందోత్సాహాల మధ్య హఠాత్తుగా పోలీసులు ఎంట్రీ ఇచ్చారు. అందరూ ఏమైందో అని కంగారు పడుతుండగానే, పోలీసులు పెళ్లికొడుకును అదుపులోకి తీసుకుని స్టేషన్కు తీసుకెళ్లారు. ఆ తర్వాత ఏం జరిగిందంటే..
అసలు కథ ఇది: పాలిగంజ్ నివాసి సంజయ్ యాదవ్ కుమారుడు అనిల్ కుమార్ వివాహం, మొరార్చక్ గ్రామానికి చెందిన భీమ్ యాదవ్ కుమార్తెతో నిశ్చయమైంది. జూన్ 15న పెళ్లి ఊరేగింపు (బారాత్) ఘనంగా జరిగింది. పెళ్లి భోజనాలు జరుగుతుండగా, అనిల్ కుమార్ తనకు అప్పటికే వివాహం జరిగిందని చెప్పిన మొదటి భార్య ‘రూబి’, సిగోడి పోలీస్ స్టేషన్కు వెళ్లి పోలీసులకు ఫిర్యాదు చేసింది. తన భర్త రెండో వివాహం చేసుకుంటున్నాడని ఆధారాలతో సహా చూపించింది.
వెంటనే సిగోడి ఎస్.హెచ్.ఓ. గ్రామానికి ఫోన్ చేసి, వరుడు అనిల్ కుమార్ ఇప్పటికే వివాహితుడని, వెంటనే పెళ్లిని నిలిపివేయాలని గ్రామ సర్పంచ్ అశోక్ యాదవ్కు సమాచారం అందించారు. సర్పంచ్ ఈ విషయాన్ని వధువు తండ్రికి చెప్పడంతో అందరూ షాక్ తిన్నారు. గ్రామంలో ఈ వార్త కార్చిచ్చులా వ్యాపించింది. పోలీసులు గ్రామానికి చేరుకుని, ఆధారాలు పరిశీలించి పెళ్లికొడుకు అనిల్ కుమార్ను అదుపులోకి తీసుకున్నారు.
పెళ్లి ఆగిపోవడంతో గ్రామస్తులు వరుడి బంధువులను గ్రామం దాటకుండా ఆపేశారు. ఈ పరిస్థితి నుంచి గౌరవప్రదంగా బయటపడేందుకు సర్పంచ్, ఇరు కుటుంబాలతో చర్చలు జరిపారు. చాలా సేపు చర్చల తర్వాత, అనిల్ కుమార్ తమ్ముడితోనే వధువు వివాహం జరిపించాలని నిర్ణయించారు. ఇరుపక్షాలు అంగీకరించడంతో, అదే మండపంలో పెళ్లికొడుకు అనిల్ తమ్ముడితో వధువుకు వివాహం జరిగింది.
మరోవైపు, పోలీసులు అనిల్ కుమార్ చేత తన మొదటి భార్య రూబితోనే ఉంటానని, ఆమెను జాగ్రత్తగా చూసుకుంటానని ఒక బాండ్ రాయించుకుని, అతడిని విడుదల చేశారు. ఆ విధంగా ఒక వింత సంఘటనతో పెళ్లి సంతోషంగా ముగిసింది.