“పెద్ద సినిమాలో ఛాన్స్ ఇప్పిస్తా” అంటూ నమ్మించి.. ప్రైవేట్ వీడియోలతో బ్లాక్‌మెయిల్! రూ.కోటి వసూలు చేశాడని ఆరోపణలు.. యువ కళాకారిణి మృతి వెనుక షాకింగ్ విషయాలు!

సినిమా రంగంలో అవకాశాల కోసం ప్రయత్నించే యువ కళాకారులు ఎలాంటి మోసాలకు గురవుతున్నారో తెలిపే విషాదకర ఘటన మహారాష్ట్రలోని విరార్ ప్రాంతంలో వెలుగులోకి వచ్చింది. బాలీవుడ్ సినిమాలు, ప్రముఖ వెబ్‌ సిరీస్‌లలో మంచి అవకాశాలు ఇప్పిస్తానని నమ్మించి, ప్రైవేట్ ఫొటోలు, వీడియోలతో బ్లాక్‌మెయిల్ చేశాడనే ఆరోపణల మధ్య యువ కళాకారిణి నళిని నామ్జోషి మృతి చెందడం కలకలం రేపుతోంది.

నళిని సాధారణ జూనియర్ ఆర్టిస్ట్‌గా పనిచేస్తూ, సినీ రంగంలో మంచి గుర్తింపు తెచ్చుకోవాలని కలలు కనేవారు. గత గురువారం ఉదయం ఎప్పటిలాగే వాకింగ్‌కు వెళ్లిన ఆమె తిరిగి ఇంటికి రాకపోవడంతో కుటుంబ సభ్యులు ఆందోళన చెందారు. ఎంత వెతికినా ఆచూకీ లభించకపోవడంతో గాలింపు చేపట్టారు. చివరకు ఓలాండా నాకా సమీపంలోని బహిరంగ ప్రదేశంలో ఆమె మృతదేహం కనిపించింది. ఆసుపత్రికి తరలించగా, అప్పటికే ఆమె మరణించినట్లు వైద్యులు నిర్ధారించారని కథనంలో పేర్కొన్నారు.

సినీ అవకాశాల పేరుతో పరిచయం.. ఆ తర్వాత బ్లాక్‌మెయిల్?

పోలీసుల విచారణలో సంగీత దర్శకుడిగా పరిచయమైన సౌరభ్ పడ్కీ పేరు తెరపైకి వచ్చినట్లు కథనం చెబుతోంది. బాలీవుడ్‌లోని పెద్ద సినిమాలు, ప్రముఖ వెబ్‌ సిరీస్‌లలో కీలక పాత్రలు ఇప్పిస్తానని నళినికి హామీ ఇచ్చి, ఆమె నమ్మకాన్ని పొందినట్లు ఆరోపణలు ఉన్నాయి.

ఆ పరిచయాన్ని ఉపయోగించుకుని, ఆమెకు సంబంధించిన ప్రైవేట్ ఫొటోలు, వీడియోలను రహస్యంగా రికార్డు చేసినట్లు కథనంలో పేర్కొన్నారు. అనంతరం వాటిని సోషల్ మీడియాలో బయటపెడతానని బెదిరిస్తూ నళినిని బ్లాక్‌మెయిల్ చేసినట్లు ఆరోపణలు వచ్చాయి.

ఈ విధంగా బెదిరింపులకు పాల్పడి ఆమె నుంచి దాదాపు రూ.కోటి వసూలు చేసినట్లు కథనం పేర్కొంది. డబ్బు నష్టం, పరువు పోతుందనే భయం, నిరంతర వేధింపులతో నళిని తీవ్ర మానసిక ఒత్తిడికి గురైనట్లు తెలుస్తోంది.

లేఖలో వేధింపుల వివరాలు?

మరణానికి ముందు నళిని ఒక లేఖ రాసినట్లు కథనం చెబుతోంది. అందులో సౌరభ్ పడ్కీ తనను ఎలా వేధించాడో, ఎలా బ్లాక్‌మెయిల్ చేశాడో వివరించినట్లు పేర్కొంది.

ఈ ఘటనపై స్థానికంగా తీవ్ర కలకలం రేగింది. అర్నాలా కోస్టల్ పోలీస్ స్టేషన్ పోలీసులు కేసు దర్యాప్తు చేస్తూ, పరారీలో ఉన్నట్లు ఆరోపణలు ఎదుర్కొంటున్న సౌరభ్ పడ్కీ కోసం గాలిస్తున్నారని కథనంలో వెల్లడించారు.