పెన్షన్‌కు సంబంధించి కోల్‌కతా హైకోర్టు ఒక సంచలన తీర్పునిచ్చింది. పెన్షన్ అనేది ఎవరూ ఇచ్చే దానం లేదా బహుమతి కాదని, అది ఉద్యోగి యొక్క చట్టబద్ధమైన మరియు రాజ్యాంగపరమైన హక్కు అని కోర్టు స్పష్టం చేసింది. ఈ తీర్పుతో ఒక వితంతువుకి పెన్షన్ పొందే మార్గం సుగమమైంది.
అసలేం జరిగింది? ఒక మెడికల్ ఆఫీసర్ మరణానంతరం ఆయన భార్య పెట్టుకున్న పెన్షన్ దరఖాస్తును రాష్ట్ర ప్రభుత్వం తిరస్కరించింది. ఈ ఉత్తర్వులను కోల్‌కతా హైకోర్టు రద్దు చేస్తూ, సదరు మహిళకు పెన్షన్ మరియు ఇతర రిటైర్మెంట్ ప్రయోజనాలను అందించాలని ఆదేశించింది.
పిటిషనర్ భర్త డాక్టర్ బిస్వాస్, మార్చి 1994 నుండి డమ్ డమ్ మున్సిపాలిటీలో ఆర్‌ఎమ్‌ఓ (RMO)గా పనిచేసేవారు. జూలై 2016లో మరణించే వరకు ఆయన నిరంతరాయంగా సేవలు అందించారు. ఆయన మరణం తర్వాత భార్య పెన్షన్ కోసం దరఖాస్తు చేసుకోగా.. ఆయన నియామకంలో అక్రమాలు జరిగాయని, కొన్ని సాంకేతిక కారణాలు చూపుతూ అధికారులు తిరస్కరించారు.
కోర్టు ఏమని పేర్కొంది? ఈ కేసు విచారణ సందర్భంగా కోర్టు కీలక వ్యాఖ్యలు చేసింది:
- డాక్టర్ బిస్వాస్ రెండు దశాబ్దాలకు పైగా మున్సిపాలిటీలో సేవలు అందించారనే నిజాన్ని విస్మరించలేము.
- సర్వీస్ కాలంలో అతడిని రెగ్యులర్ ఉద్యోగిగానే పరిగణించి, ప్రభుత్వ నిధుల నుండి జీతభత్యాలు చెల్లించారు.
- అప్పట్లో ఆయన నియామకంపై ఎలాంటి ప్రశ్నలు తలెత్తలేదు. ఇప్పుడు 20 ఏళ్ల సర్వీస్ తర్వాత పెన్షన్ నిరాకరించడం అన్యాయం మరియు రాజ్యాంగ విరుద్ధం.
- పెన్షన్ నిరాకరించడం అంటే రాజ్యాంగంలోని ఆర్టికల్ 14 (సమానత్వపు హక్కు) మరియు ఆర్టికల్ 21 (గౌరవప్రదమైన జీవన హక్కు)ను ఉల్లంఘించడమే. ఎందుకంటే పెన్షన్ అనేది గౌరవప్రదమైన జీవనానికి అవసరమైన అంతర్భాగం.