తమిళనాడు: రామనాథపురం జిల్లా ఉచ్చిపులి సమీపంలోని నాగాచ్చి గ్రామానికి చెందిన శశికళ (27), అదే ప్రాంతానికి చెందిన పాండి (28) గతంలో గాఢంగా ప్రేమించుకున్నారు. పాండి రామేశ్వరంలో సొంతంగా ట్రావెల్స్ వ్యాపారం చేసేవాడు.
ప్రేమ విఫలం – పెళ్లి:
వీరిద్దరి ప్రేమ విషయం ఇంట్లో తెలియడంతో, పాండి తల్లిదండ్రులు శశికళ ఇంటికి వెళ్లి సంబంధం అడిగారు. కానీ శశికళ కుటుంబ సభ్యులు నిరాకరించారు. శశికళ ఇష్టంతో సంబంధం లేకుండా, ఐదేళ్ల క్రితం ఆమె బంధువైన మురుగన్ అనే వ్యక్తితో బలవంతంగా పెళ్లి జరిపించారు. శశికళకు ప్రస్తుతం నాలుగేళ్ల కుమార్తె ఉంది.
మారని ప్రేమ – పరారు:
పెళ్లయి ఐదేళ్లు గడిచినా, పాప పుట్టినా శశికళ తన పాత ప్రేమికుడు పాండిని మర్చిపోలేకపోయింది. రహస్యంగా అతనితో ఫోన్లో టచ్‌లో ఉండేది. గత నెలలో ఆమె భర్త మురుగన్ పని మీద చెన్నై వెళ్లగా, అదే అదనుగా శశికళ తన బిడ్డను వదిలేసి పాండితో కలిసి వెళ్ళిపోయింది. దీంతో ఆమె తల్లిదండ్రులు పోలీసులకు ఫిర్యాదు చేశారు.
పోలీసుల కౌన్సెలింగ్:
పోలీసులు వారిద్దరినీ పట్టుకుని స్టేషన్‌కు పిలిపించారు. శశికళకు బిడ్డ ఉన్న విషయాన్ని, ఆమె భవిష్యత్తును గుర్తుచేస్తూ పోలీసులు కౌన్సెలింగ్ ఇచ్చారు. ఆ తర్వాత శశికళ తన తండ్రితో కలిసి ఇంటికి వెళ్లడానికి అంగీకరించింది. అయితే పాండిని విడిచిపెట్టడం, స్టేషన్ వరకు వెళ్లాల్సి రావడంతో ఆమె తీవ్ర మనోవేదనకు గురైంది. ఈ క్రమంలోనే శశికళ రెండు రోజుల క్రితం తన ఇంట్లో ఉరివేసుకుని ఆత్మహత్య చేసుకుంది.
ప్రియురాలి మరణం తట్టుకోలేక..
శశికళ మరణవార్త పాండికి తెలిసింది. అప్పుడు అతను టూరిస్టులను దింపడానికి బెంగళూరు వెళ్లాడు. తిరిగి వస్తుండగా ధర్మపురి జిల్లా పాలయం టోల్‌గేట్ సమీపంలో కారు ఆపి, తాను ప్రాణంగా ప్రేమించిన ప్రియురాలు ఇక లేదనే బాధతో అక్కడే ఉన్న ఒక చెట్టుకు ఉరివేసుకుని తనువు చాలించాడు.
ఐదేళ్ల పాటు దూరంగా ఉన్నా, ఒకరినొకరు మర్చిపోలేక ఈ ప్రేమ జంట ఇలా ప్రాణాలు తీసుకోవడం రామేశ్వరం పరిసర ప్రాంతాల్లో తీవ్ర విషాదాన్ని నింపింది.