ఈ రోజుల్లో సోషల్ మీడియాలో ఏదైనా వైరల్ కావడానికి ఎంతో సమయం పట్టడం లేదు. ప్రతి ఒక్కరి చేతిలో మొబైల్ ఉండటంతో, అప్లోడ్ చేసిన వీడియోలు రాత్రికి రాత్రే ప్రపంచమంతా తెలిసిపోతున్నాయి. వాటిలో కొన్ని వీడియోలు నెటిజన్లను ఆశ్చర్యానికి గురిచేస్తుంటాయి. ప్రస్తుతం అటువంటి వీడియో ఒకటి సోషల్ మీడియాలో విపరీతంగా చక్కర్లు కొడుతోంది. ఆ వీడియోలో కొందరు వ్యక్తులు నోట్లతో చేసిన అతి పొడవైన దండను పట్టుకుని నిలబడటం మనం చూడవచ్చు. ఇది ఒక పెళ్లి వేడుకకు సంబంధించిన వీడియో.
500 మరియు 100 రూపాయల నోట్లతో దండ: ఈ దృశ్యం ఒక వివాహ వేడుకలో భాగంగా జరిగినట్లు స్థానికులు చెబుతున్నారు. వైరల్ అవుతున్న ఈ 20 సెకన్ల వీడియోలో, పెళ్లికొడుకు ఆ భారీ దండను మెడలో వేసుకోవడానికి నిచ్చెన ఎక్కడం కనిపిస్తుంది. కింద నిలబడిన చాలా మంది వ్యక్తులు ఆ దండను పట్టుకుని సహాయం చేస్తున్నారు. అక్కడ ఉన్న జీపులు, ఇతర వాహనాల కంటే ఆ దండ చాలా పొడవుగా ఉండటం విశేషం. ఈ దండను 500 మరియు 100 రూపాయల నోట్లతో తయారు చేసినట్లు సమాచారం. దీని పొడవు సుమారు 100 అడుగులు ఉంటుందని అంచనా.
వేగంగా వైరల్ అవుతున్న వీడియో: ఈ ఘటనపై డీగ్ జిల్లా పోలీస్ సూపరింటెండెంట్ శరణ్ గోపినాథ్ కాంబ్లే స్పందిస్తూ.. ఈ దండను అద్దెకు తీసుకున్నారని, ఇప్పటివరకు ఈ విషయంలో ఎలాంటి చట్టవిరుద్ధమైన అంశాలు బయటపడలేదని ధృవీకరించారు. మేవత్ ప్రాంతంలోని జుర్హరా పోలీస్ స్టేషన్ పరిధిలోని బమన్వాడి గ్రామంలో ఏప్రిల్ 19న ఈ వివాహం జరిగింది. ఈ వేడుకలో ఇద్దరు వరులు.. రుక్నుద్దీన్ మేవ్ మరియు అతని మేనల్లుడు అన్సార్ మేవ్ ఈ దండను ధరించి కనిపించారు. గ్రామ సర్పంచ్ అబ్దుల్ మజీద్ మాట్లాడుతూ.. ఇది స్థానిక సంప్రదాయంలో భాగమని, ఈ వేడుక కోసమే ప్రత్యేకంగా దీనిని తెప్పించారని తెలిపారు.