గ్రామాల్లో విద్యుత్ సరఫరాలో అంతరాయం కలగడం సాధారణ విషయమే. కానీ, మధ్యప్రదేశ్లోని ఉజ్జయిని జిల్లాలో ఒక గ్రామంలో జరిగిన పెళ్లిలో కరెంట్ పోవడంతో పెద్ద గందరగోళమే నెలకొంది.
విద్యుత్ అంతరాయంతో మారిన వధువులు ఉజ్జయిని జిల్లాలోని అస్లానా గ్రామంలో మే 5న ఇద్దరు అక్కాచెల్లెళ్లకు ఒకే మండపంలో ఘనంగా వివాహం జరుగుతోంది. ఇద్దరు వధువులు ఒకే విధమైన దుస్తులు (ఔట్ఫిట్స్) ధరించి, ముఖంపై ముసుగుతో ఉన్నారు. తమ తమ వరులతో పెళ్లి తంతులో భాగంగా ‘ఫేరే’ (ఏడడుగులు) వేయడానికి సిద్ధమవుతుండగా, అకస్మాత్తుగా విద్యుత్ సరఫరా నిలిచిపోయింది. చీకటిలో కంగారుగా ఉండటంతో, పొరపాటున ఇద్దరు వధువులు తమ వరులను మార్చుకుని పెళ్లి తంతు పూర్తి చేసుకున్నారు.
అసలు విషయం తెలియక వరులు తమకు తెలియకుండానే వేరే వధువులను ఇంటికి తీసుకెళ్లారు. ఆ రోజు రాత్రి, వధువు ముసుగు తీసినప్పుడు ఈ పొరపాటు బయటపడింది. అది చూసి వరులు షాక్కు గురయ్యారు. తాము పెళ్లి చేసుకున్నది వేరే వధువులని తెలియగానే, వారు పెళ్లిని అంగీకరించేందుకు నిరాకరించారు.
పండితుడిని పిలిపించి మళ్లీ పెళ్లి వెంటనే ఇరు కుటుంబ సభ్యులు పండితుడిని పిలిపించి, చర్చలు జరిపారు. ఆ తర్వాత తప్పును సరిదిద్దుకుని, సరైన వరులతో సరైన వధువులకు మళ్లీ వివాహం జరిపించారు. ఈ పెళ్లిలో వరుల పేర్లు భోలా మరియు గణేష్. గణేష్కు నికితతో, భోలాకు నికిత సోదరితో వివాహం జరగాల్సి ఉంది. కానీ కరెంట్ పోవడం, ఇద్దరు వధువుల దుస్తులు ఒకేలా ఉండటంతో ఈ గందరగోళం చోటుచేసుకుంది.
వధువుల తండ్రి రమేష్ మాట్లాడుతూ, “కరెంట్ పోవడం వల్లే ఈ కన్ఫ్యూజన్ జరిగింది. అయితే ఇప్పుడు సరైన వరులతో నా ఇద్దరు కుమార్తెలకు వివాహం జరిపించాము, అంతా సవ్యంగానే ఉంది” అని తెలిపారు. సినిమాల్లో మాత్రమే చూసే ఇటువంటి సంఘటనలు నిజ జీవితంలో జరగడంతో ఈ వార్త గ్రామంలో హాట్ టాపిక్గా మారింది.