లాతూర్ – క్రైమ్ డెస్క్: న్యాయం చేయాల్సిన పోలీసులే నరరూప రాక్షసులకు కొమ్ముకాస్తే.. రక్షణ కల్పించాల్సిన వారే లంచం కోసం వేధిస్తే.. ఆ సామాన్యుడు ఇంకెవరికి మొరపెట్టుకోవాలి? మహారాష్ట్రలోని లాతూర్ జిల్లా జల్‌కోట్ పోలీస్ స్టేషన్ పరిధిలో జరిగిన ఒక దారుణ ఘటన ఇప్పుడు యావత్ దేశాన్ని ఉలిక్కిపడేలా చేసింది. తన భార్యపై జరిగిన అఘాయిత్యానికి న్యాయం పోరాటం చేసి విసిగిపోయిన ఒక రైతు, చివరకు మృత్యువునే శరణు కోరాడు. ఆత్మహత్యకు ముందు తన చావుకు కారణమైన పోలీసు అధికారులు సహా ఆరుగురి పేర్లను తన చేతిపై రాసి ప్రాణాలు వదిలిన వైనం స్థానికంగా కలకలం రేపుతోంది.
అసలేం జరిగింది?
బాధిత మహిళ ఇచ్చిన వాంగ్మూలం ప్రకారం.. ఫిబ్రవరి 21న గణేష్ కేంద్రే అనే వ్యక్తి ఆమెపై వినయభంగం (వేధింపులు) చేశాడు. ఈ అవమానంపై ఆమె భర్త అదే రోజు పోలీసులను ఆశ్రయించాడు. అయితే, బాధితుడికి అండగా ఉండాల్సిన పోలీసులు అసలైన వికృత రూపాన్ని ప్రదర్శించారు.
- లంచం డిమాండ్: పదే పదే పోలీస్ స్టేషన్ చుట్టూ తిరిగినా ఎఫ్ఐఆర్ (FIR) నమోదు చేయకుండా కాలయాపన చేశారు. పైగా కేసు నమోదు చేయాలంటే రూ. 25,000 లంచం ఇవ్వాలని డిమాండ్ చేసినట్లు బాధితురాలు ఆరోపించింది.
ఒకవైపు పోలీసులు.. మరోవైపు నిందితులు!
న్యాయం కోసం వెళ్లిన రైతుకు అడుగడుగునా అవమానమే ఎదురైంది. అటు పోలీసులు సహకరించకపోగా, ఇటు నిందితులు తులసీదాస్ కేంద్రే, గణేష్ కేంద్రే, శివాజీ కేంద్రేలు ఫిర్యాదు వెనక్కి తీసుకోవాలని వేధించడం మొదలుపెట్టారు. “కేసు విత్ డ్రా చేసుకోకపోతే చంపేస్తాం” అంటూ నిరంతరం బెదిరింపులకు పాల్పడ్డారు. ఈ ద్వంద్వ వేధింపులతో తీవ్ర మానసిక ఒత్తిడికి లోనైన ఆ రైతు, ఏప్రిల్ 6న రాత్రి విషం తాగి బలవన్మరణానికి పాల్పడ్డాడు.
చేతిపైనే ‘మరణ వాంగ్మూలం’
ఆత్మహత్యకు ముందు తన చేతిపై నిందితుల పేర్లను రాస్తూ.. “తులసీదాస్ గణపతి కేంద్రే, గణేష్ తులసీదాస్ కేంద్రే, శివాజీ రాందాస్ కేంద్రే మరియు వారి బంధువులు నన్ను చంపేస్తామని బెదిరిస్తున్నారు. దీనికి సంబంధించిన వివరాల కాగితం నా జేబులో ఉంది” అని పేర్కొన్నారు.
పోలీసులపైనా కేసు నమోదు!
ఈ ఘటన జిల్లావ్యాప్తంగా నిరసనలకు దారితీయడంతో ఉన్నతాధికారులు స్పందించారు. రైతును ఆత్మహత్యకు ప్రేరేపించినందుకు గాను నిందితులతో పాటు, విధి నిర్వహణలో నిర్లక్ష్యం వహించి లంచం డిమాండ్ చేసిన పోలీస్ సిబ్బంది శివాజీ రాందాస్ కేంద్రే, మాణిక్ సంతారామ్ కస్బేలపై కూడా కేసు నమోదు చేశారు. మొత్తం ఆరుగురిని ఈ కేసులో ముద్దాయిలుగా చేర్చి దర్యాప్తు చేస్తున్నారు.
లాతూర్ జిల్లాను వణికించిన ఈ ఘటనపై రాష్ట్ర ప్రభుత్వం సీరియస్ అయ్యింది. బాధ్యులైన పోలీసులపై కఠిన చర్యలు తీసుకోవాలని పౌర సమాజం డిమాండ్ చేస్తోంది.