బీహార్ రాష్ట్రంలోని సమస్తిపూర్‌లో ఓ మహిళపై లైంగిక వేధింపులకు పాల్పడ్డాడంటూ వచ్చిన అత్యవసర ఫోన్ కాల్ ఆధారంగా నిందితుడిని అరెస్టు చేసేందుకు వెళ్లిన పోలీసులపైనే ఆ వ్యక్తి దాడికి తెగబడ్డాడు. పోలీసుల యూనిఫాం చింపేసి, వారిని బురదలోకి తోసేసి కుస్తీ పడుతూ అరాచకం సృష్టించిన ఆ వ్యక్తిని, చివరకు పోలీసులు తాళ్లతో కట్టేసి లాక్కెళ్లిన షాకింగ్ ఘటన తీవ్ర కలకలం రేపింది.
చట్టాన్ని, పోలీసులను ఏమాత్రం లెక్కచేయకుండా బహిరంగంగా సాగిన ఈ దౌర్జన్యానికి సంబంధించిన దృశ్యాలు సోషల్ మీడియాలో దావానలంలా వ్యాపిస్తున్నాయి. ఘటన జరిగిన రోజున, ఆ ప్రాంతానికి చెందిన ఓ మహిళ తనకు ఎదురైన లైంగిక వేధింపుల గురించి పోలీసులకు అత్యవసర సమాచారం అందించింది.
ఫిర్యాదు ఆధారంగా వెంటనే ఘటనా స్థలానికి చేరుకున్న పోలీసులు, నిందితుడిని పట్టుకుని విచారణకు రావాలని కోరారు. కానీ, పోలీసులతో వెళ్లడానికి నిరాకరించిన ఆ వ్యక్తి, అక్కడ విధుల్లో ఉన్న పోలీసులతో తీవ్ర వాగ్వాదానికి దిగడమే కాకుండా, వారి చొక్కా పట్టుకుని లాగి యూనిఫాంను చింపి పారేశాడు.
ఒకానొక దశలో హద్దులు దాటిన ఆ వ్యక్తి, పోలీసులను పట్టుకుని పక్కనే ఉన్న బురదలోకి తోసేసి వారితో కుస్తీ పట్టడం ప్రారంభించాడు. దీంతో అక్కడ తీవ్ర అలజడి, ఉద్రిక్తత నెలకొంది. వెంటనే అదనపు పోలీసు బలగాలు అక్కడికి చేరుకుని, పారిపోవడానికి ప్రయత్నించిన ఆ వ్యక్తిని చుట్టుముట్టి పట్టుకున్నాయి. అతని చేతులను బలమైన తాడుతో కట్టేసి చాకచక్యంగా పోలీస్ స్టేషన్‌కు లాక్కెళ్లారు.
మహిళ ఫిర్యాదు మేరకు అరెస్టు చేయడానికి వెళ్లిన చోట పోలీసులపైనే దాడి చేసి యూనిఫాం చింపేసిన ఆ వ్యక్తిపై.. ప్రభుత్వ ఉద్యోగుల విధులకు ఆటంకం కలిగించడం, దాడి చేయడం వంటి అదనపు కఠిన సెక్షన్ల కింద కేసు నమోదు చేసి పోలీసులు చర్యలు తీసుకుంటున్నారు.