పేరెంటింగ్ టిప్స్ (వర్షాకాలం): వర్షాకాలం పిల్లల ముఖాల్లో చిరునవ్వులు నింపుతుంది, కానీ తల్లిదండ్రుల్లో మాత్రం ఆందోళన పెంచుతుంది. ఉదయం ఎండగా ఉండి, కాసేపటికే వర్షం మొదలవుతుంది. ఇలాంటి సమయంలో స్కూల్కు వెళ్లే పిల్లల దుస్తులు తడవడం, బూట్లు తడవటం, బ్యాగ్లోని పుస్తకాలు పాడైపోవడం సర్వసాధారణం. దీంతో పాటు ఈ కాలంలో వైరల్ ఇన్ఫెక్షన్లు, జలుబు, దగ్గు, కడుపు సంబంధిత సమస్యలు మరియు దోమల ద్వారా వ్యాపించే వ్యాధుల ముప్పు పెరుగుతుంది.
పిల్లలకు కేవలం రెయిన్కోట్ వేసి పంపితే సరిపోదు, వారి స్కూల్ బ్యాగ్లో కొన్ని ముఖ్యమైన వస్తువులను ముందుగానే ఉంచడం మంచిది. ఈ చిన్న చిన్న జాగ్రత్తలు మీ పిల్లలు రోజంతా సౌకర్యంగా ఉండేలా చేస్తాయి.
1. వాటర్ప్రూఫ్ బ్యాగ్ కవర్: అకస్మాత్తుగా భారీ వర్షం కురిసినప్పుడు బ్యాగ్ తడిసే అవకాశం ఉంటుంది. వాటర్ప్రూఫ్ కవర్ ఉంటే మీ పిల్లల పుస్తకాలు, నోట్బుక్లు సురక్షితంగా ఉంటాయి. ఇది తేలికగా ఉంటుంది, బ్యాగ్లో పెద్దగా స్థలాన్ని ఆక్రమించదు.
2. తేలికపాటి రెయిన్కోట్ లేదా ఫోల్డింగ్ గొడుగు: చిన్న పిల్లలకు రెయిన్కోట్ చాలా మంచిది, ఎందుకంటే అది వేసుకున్న తర్వాత వారి చేతులు ఖాళీగా ఉంటాయి. పెద్ద పిల్లలైతే చిన్నగా ఉండే ‘ఫోల్డింగ్ గొడుగు’ను బ్యాగ్లో ఉంచుకోవచ్చు. అయితే, వస్తువుల బరువు వల్ల పిల్లలకు బ్యాగ్ మోయడం భారంగా మారకుండా జాగ్రత్తపడండి.
3. అదనపు సాక్స్ మరియు ఒక జత దుస్తులు: రెయిన్కోట్ ఉన్నప్పటికీ, ఒక్కోసారి సాక్స్ మరియు యూనిఫాం తడిసిపోవచ్చు. తడి బట్టలతో ఎక్కువసేపు స్కూల్లో ఉండటం వల్ల అనారోగ్య సమస్యలు రావచ్చు. కాబట్టి, ఒక చిన్న జిప్ లాక్ కవర్లో ఒక జత సాక్స్ మరియు అదనపు దుస్తులను బ్యాగ్లో ఉంచండి.
4. చిన్న హ్యాండ్ శానిటైజర్ బాటిల్: స్కూల్లో ఆడుకునేటప్పుడు పిల్లలు చేతులు కడుక్కోవడం మర్చిపోవచ్చు. వర్షాకాలంలో క్రిములు త్వరగా వ్యాపిస్తాయి కాబట్టి, బ్యాగ్లో చిన్న హ్యాండ్ శానిటైజర్ ఉంచడం మంచి అలవాటు. భోజనానికి ముందు లేదా ఆడుకున్న తర్వాత దీన్ని వాడుకోవచ్చు.
5. దోమల నివారణ రోల్-ఆన్ (Mosquito Repellent Roll-on) లేదా ప్యాచ్: వర్షాకాలంలో దోమల వల్ల డెంగ్యూ, మలేరియా ముప్పు ఉంటుంది. స్కూలుకు వెళ్లే ముందు పిల్లలకు దోమల నివారణ రోల్-ఆన్ రాయండి లేదా బ్యాగ్లో దోమల నివారణ ప్యాచ్ ఉంచండి.
6. శుభ్రమైన మరియు సురక్షితమైన వాటర్ బాటిల్: వర్షాకాలంలో బయట దొరికే నీరు కలుషితమై రోగాలకు కారణమవుతుంది. ఇంటి నుండి కాచి చల్లార్చిన నీటిని లేదా ఫిల్టర్ చేసిన నీటిని బాటిల్లో నింపి ఇవ్వండి. స్కూల్లో బయటి నీరు తాగవద్దని పిల్లలకు అవగాహన కల్పించండి.
7. జిప్ లాక్ పౌచ్లు లేదా ప్లాస్టిక్ బ్యాగులు: తడిచిన సాక్స్, రుమాలు లేదా రెయిన్కోట్లను నేరుగా బ్యాగ్లో వేస్తే, మిగిలిన పుస్తకాలు కూడా తడిసిపోతాయి. అందుకే కొన్ని జిప్ లాక్ పౌచ్లను బ్యాగ్లో ఉంచడం ద్వారా మిగతా సామాగ్రిని తడవకుండా కాపాడుకోవచ్చు.
8. కాటన్ రుమాలు లేదా చిన్న టవల్: వర్షంలో ముఖం, చేతులు లేదా జుట్టు తడవడం సాధారణం. కాబట్టి, ఒక చిన్న కాటన్ రుమాలు లేదా చిన్న టవల్ను బ్యాగ్లో ఉంచితే, పిల్లలు తడిని త్వరగా తుడిచేసుకోవడానికి వీలవుతుంది.