భారతదేశం: భారతదేశం వైవిధ్యమైన సంస్కృతులు, ఆచారాలకు నిలయం. అయితే కొన్ని గ్రామాలు, అక్కడి వింత ఆచారాలు వినడానికి చాలా ఆశ్చర్యకరంగా ఉంటాయి. అటువంటి వింత ఆచారం ఉన్న గ్రామమే రాజస్థాన్లోని జైసల్మేర్లో ఉన్న ‘రామ్దేవ్’ (రాందేయో) గ్రామం.
గ్రామం ప్రత్యేకత..
ఈ గ్రామంలో ప్రతి పురుషుడు రెండు పెళ్లిళ్లు చేసుకోవడం ఒక ఆచారంగా వస్తోంది. ఇక్కడి ప్రజలు ఈ ఆచారాన్ని చాలా నిబద్ధతతో పాటిస్తారు. ఈ గ్రామంలో ఒకే పెళ్లి చేసుకున్న పురుషులకు సంతానం కలగడం లేదని, ఒకవేళ కలిగినా కేవలం ఆడపిల్లలే పుడుతున్నారని గ్రామస్తుల నమ్మకం. అందుకే, వంశాభివృద్ధి కోసం పురుషులు రెండో పెళ్లి చేసుకోవడం అవసరమని ఇక్కడ ప్రజలు భావిస్తారు. విచిత్రమేమిటంటే, రెండో భార్యకు ఖచ్చితంగా మగపిల్లవాడే పుడతాడని వారి ప్రగాఢ నమ్మకం.
సవతుల మధ్య సఖ్యత..
సాధారణంగా సవతులు అంటేనే గొడవలు ఉంటాయని అనుకుంటాం. కానీ, ఈ గ్రామంలోని ఇద్దరు భార్యలు అక్కాచెల్లెళ్లలా కలిసి మెలిసి ఉంటారు. ఈ ఆచారం గురించి తెలిసిన మహిళలు కూడా దీనిని తమ విధిగా భావించి, భర్త రెండో వివాహాన్ని అంగీకరిస్తారు.
మారుతున్న కాలం..
ప్రస్తుతం గ్రామంలోని కొత్త తరం యువకులు ఈ ఆచారాన్ని వ్యతిరేకిస్తున్నారు. ఇది చట్టవిరుద్ధమని, పురుషులు రెండో పెళ్లికి సాకులు వెతుక్కుంటున్నారని కొత్త తరం వారు భావిస్తున్నారు. భారతదేశ చట్టాల ప్రకారం విడాకులు తీసుకోకుండా రెండో పెళ్లి చేసుకోవడం నేరం. అయితే, ఈ గ్రామంలో ఎవరూ ఫిర్యాదు చేయకపోవడంతో, పోలీసులకు కూడా ఈ ఆచారం గురించి తెలిసినా ఏమీ చేయలేని పరిస్థితి నెలకొంది.