న్యూఢిల్లీ: అమెరికా అధ్యక్షుడు డొనాల్డ్ ట్రంప్ భారత ప్రధాని నరేంద్ర మోదీతో ఫోన్ ద్వారా సంభాషించారు. ఇరాన్ – అమెరికా యుద్ధం ప్రారంభమైన తర్వాత ట్రంప్‌తో మోదీ మాట్లాడటం ఇదే మొదటిసారి. ఈ చర్చల్లో హోర్ముజ్ జలసంధి (Strait of Hormuz) ప్రాముఖ్యత మరియు పశ్చిమ ఆసియా దేశాల్లో నెలకొన్న ఉద్రిక్త పరిస్థితులపై ఇరువురు నేతలు సుదీర్ఘంగా చర్చించారు. ఇప్పటికే ప్రధాని మోదీ ఇరాన్ అధ్యక్షుడు మసూద్ పెజెష్కియాన్‌తో కూడా మాట్లాడటం గమనార్హం.
మధ్యప్రాచ్యంలో నెలకొన్న యుద్ధ వాతావరణంపై చర్చించినట్లు భారత్‌లోని అమెరికా రాయబారి సెర్గియో గోర్ ఒక ట్వీట్ ద్వారా వెల్లడించారు.
మోదీ – ట్రంప్ చర్చల సారాంశం: అధ్యక్షుడు డొనాల్డ్ ట్రంప్ ప్రధాని మోదీకి ఫోన్ చేసి, హోర్ముజ్ జలసంధిని తెరిచి ఉంచడం ఎంత అవసరమో చర్చించారు. ఈ మార్గం ద్వారా అంతర్జాతీయ నౌకాయానం ఎటువంటి ఆటంకాలు లేకుండా సాగాలని ఇరువురు నేతలు అభిప్రాయపడ్డారు. ఈ చర్చల అనంతరం ప్రధాని మోదీ కూడా ‘ఎక్స్’ (ట్విట్టర్) వేదికగా వివరాలను పంచుకున్నారు.
ప్రధాని మోదీ ట్వీట్: “అమెరికా అధ్యక్షుడు డొనాల్డ్ ట్రంప్ నుండి ఫోన్ కాల్ వచ్చింది. పశ్చిమ ఆసియాలో నెలకొన్న పరిస్థితులపై మేమిద్దరం అభిప్రాయాలను పంచుకున్నాము. ఉద్రిక్తతలను తగ్గించి, శాంతిని పునరుద్ధరించడానికి భారత్ పూర్తి మద్దతు ఇస్తుంది.
హోర్ముజ్ జలసంధి నిరంతరం తెరిచి ఉండేలా చూడటం మరియు ప్రపంచమంతా సురక్షితంగా ఆ మార్గాన్ని ఉపయోగించుకోవడం చాలా అవసరం. ప్రాంతీయ శాంతి మరియు స్థిరత్వం కోసం మేమిద్దరం నిరంతరం సంప్రదింపులు జరపడానికి అంగీకరించాము” అని ప్రధాని మోదీ తన పోస్ట్‌లో పేర్కొన్నారు.