న్యూజిలాండ్ పర్యటనలో ఉన్న భారత ప్రధాని నరేంద్ర మోదీ, ప్రెస్ కాన్ఫరెన్స్ నిర్వహించకపోవడంపై అక్కడి ఒక పాత్రికేయుడు విదేశాంగ మంత్రిత్వ శాఖను ప్రశ్నించారు. దీనికి సమాధానంగా, ప్రధాని మోదీ ఓ ‘ప్రత్యేకమైన’ భారతీయ రాజకీయ నాయకుడని, ఆయన ఓటర్లతో నేరుగా అనుసంధానం కావడానికే ఇష్టపడతారని, ‘మధ్యవర్తుల’ ద్వారా మాట్లాడటం ఆయనకు నచ్చదని విదేశాంగ శాఖ పేర్కొంది.
ఏమైందంటే?
ప్రధాని మోదీ తన రెండు రోజుల న్యూజిలాండ్ పర్యటనలో భాగంగా ఒక మీడియా సమావేశంలో పాల్గొన్నారు. ఆ సందర్భంగా విదేశాంగ మంత్రిత్వ శాఖ కార్యదర్శి (ఈస్ట్) రుద్రంద్ర టండన్ను, ప్రధాని ఎందుకు పాత్రికేయులతో మాట్లాడటం లేదని, ప్రెస్ కాన్ఫరెన్స్ ఎందుకు నిర్వహించడం లేదని ఒక జర్నలిస్టు ప్రశ్నించారు. ఈ ప్రశ్నకు టండన్ నవ్వుతూ స్పందిస్తూ, ఇలాంటి ప్రశ్న గతంలోనే నార్వే పర్యటనలో కూడా ఎదురైందని, ఇది తనకు ‘దేజా వూ’ (Déjà vu – అంటే ఏదైనా విషయం గతంలోనే జరిగినట్లు అనిపించడం) లా అనిపిస్తోందని అన్నారు.
‘మధ్యవర్తులు అవసరం లేదు’
ఈ విషయంపై రుద్రంద్ర టండన్ మాట్లాడుతూ, “ఒక ప్రభుత్వ అధికారిగా ప్రధాని మోదీ రాజకీయ శైలిని విశ్లేషించడం సరికాదు. ఆయన ఎంతో విజయవంతమైన రాజకీయ నాయకుడు. భారతీయ ఓటర్లు, ముఖ్యంగా గ్రామీణ ప్రాంతాల్లోని ప్రజలు తమ నాయకులతో నేరుగా సంభాషించడానికే ఇష్టపడతారు. మధ్యవర్తుల ద్వారా వచ్చే సమాచారం వారికి నచ్చదు. ప్రధాని మోదీ తన ఓటర్లతో నేరుగా మమేకమయ్యే కళలో ఆరితేరారు. ఆయన ఇప్పుడు మూడోసారి ప్రధానిగా కొనసాగుతున్నారు మరియు దేశంలో అత్యధిక కాలం సేవలు అందించిన ప్రధానమంత్రులలో ఒకరు” అని వివరించారు.
పర్యటన నేపథ్యం
గత 40 ఏళ్లలో ఒక భారతీయ ప్రధాని న్యూజిలాండ్లో పర్యటించడం ఇదే మొదటిసారి. మూడు దేశాల పర్యటనలో (ఇండోనేషియా, ఆస్ట్రేలియా మరియు న్యూజిలాండ్) భాగంగా ప్రధాని మోదీ ప్రస్తుతం తన పర్యటన చివరి దశలో ఉన్నారు.