సంవత్సరం పొడవునా తెరిచి ఉంటూ, రోజులో కేవలం 2 నిమిషాలు మాత్రమే మూసివేసే వింత దేవాలయం ఎక్కడుందో తెలుసుకుందాం. కేరళలోని ప్రసిద్ధ కృష్ణాలయాల్లో తిరువార్పు కృష్ణ దేవాలయం ఒకటి. ఇది సుమారు 1,500 సంవత్సరాల పురాతనమైనది. కొట్టాయం పట్టణానికి 6-8 కి.మీ దూరంలో మీనాక్షి నది ఒడ్డున ఈ ఆలయం ఉంది.
ఆకలి తీర్చుకునే కృష్ణుడు: కంసుడిని చంపిన తర్వాత కృష్ణుడికి ఆకలి, కోపం ఎక్కువగా ఉండేవని చెబుతారు. ఇక్కడ కృష్ణుడు అదే రూపంలో భక్తులకు దర్శనమిస్తాడు. ఈ కృష్ణుడికి ఎప్పుడూ ఆకలి వేస్తుందని భక్తుల నమ్మకం. అందుకే ఈ ఆలయాన్ని ఇతర దేవాలయాల వలె కాకుండా పగలు, రాత్రి అనే తేడా లేకుండా 365 రోజులు తెరిచే ఉంచుతారు. రాత్రి 11:58 నుండి 12:00 వరకు.. అంటే కేవలం రెండు నిమిషాలు మాత్రమే ఆలయ తలుపులు మూసివేస్తారు.
విగ్రహ విశిష్టత మరియు చరిత్ర: ఈ కృష్ణుడికి నాలుగు చేతులు ఉన్నాయి. కుడి చేతిలో అన్నం (ప్రసాదం), వెనుక వైపు చేతుల్లో శంఖు చక్రాలు ఉంటాయి.
- మహాభారత సంబంధం: పాండవులు వనవాసంలో ఉన్నప్పుడు ప్రతిరోజూ పూజించుకోవడానికి కృష్ణుడు స్వయంగా ఈ విగ్రహాన్ని వారికి ఇచ్చారని పురాణాలు చెబుతున్నాయి. వనవాసం ముగిసిన తర్వాత పాండవులు ఆ విగ్రహాన్ని స్థానికులకు ఇచ్చారు. కానీ కొన్ని కారణాల వల్ల వారు పూజలు చేయలేక సముద్రంలో విసిరేశారు.
- పునరుద్ధరణ: చాలా కాలం తర్వాత విల్వమంగళ స్వామి (పద్మపాదాచార్యులు) పడవలో వెళ్తుండగా, సముద్రం నుండి ఈ విగ్రహం లభించింది. ఆయన ఈ విగ్రహాన్ని ప్రస్తుతం ఆలయం ఉన్న చోట ప్రతిష్టించారు.
ఆలయ విశేషాలు:
- మొదటి నైవేద్యం: పూర్వకాలం నుండి ఈ కృష్ణుడికి మామిడికాయ ఊరగాయ, కొబ్బరి నీళ్లు నైవేద్యంగా సమర్పించేవారు. నేటికీ ‘ఆరాట్టు’ ఉత్సవ సమయంలో విగ్రహాన్ని మఠానికి తీసుకెళ్లి అదే నైవేద్యాన్ని సమర్పిస్తారు.
- దోష నివారణ: ఇక్కడి కృష్ణుడిని దర్శించుకుని ప్రసాదం స్వీకరిస్తే నవగ్రహ దోషాలు, సంతాన దోషం, సర్ప దోషం మరియు వివాహ దోషాల నుండి విముక్తి కలుగుతుందని భక్తుల ప్రగాఢ విశ్వాసం.
- ఉష పాయసం: తెల్లవారుజామున 2 గంటలకే ఆలయం తెరుస్తారు. 3 గంటలకు బియ్యం, బెల్లం, నెయ్యి, కదలీ అరటిపండు మరియు ఎండు కొబ్బరితో చేసిన ‘ఉష పాయసం’ నైవేద్యంగా పెడతారు. ఈ పాయసం తయారీ విధానం చాలా ప్రత్యేకం.