హారర్ తరహా సినిమాలు చూస్తున్నప్పుడు భయపడటం సహజమే. కానీ, ఒక సినిమా చిత్రీకరణ సమయంలో వరుసగా జరిగిన ప్రమాదాలు, ఆ చిత్రం విడుదలైన తర్వాత థియేటర్లలో ప్రేక్షకులకు ఎదురైన భయానక అనుభవాల గురించి నేటికీ కథలు కథలుగా చెప్పుకుంటున్నారంటే.. అది 1973లో వచ్చిన హాలీవుడ్ క్లాసిక్ చిత్రం ‘ది ఎక్సార్సిస్ట్’ (The Exorcist) గురించే.
చలనచిత్ర రంగంలో ఈ సినిమాను ‘ప్రపంచంలోనే అత్యంత శపించబడిన చిత్రం’ అని పిలుస్తుంటారు.
విలియం పీటర్ బ్లాటీ రాసిన నవల ఆధారంగా విలియం ఫ్రీడ్‌కిన్ ఈ చిత్రానికి దర్శకత్వం వహించారు. ఈ సినిమా షూటింగ్ సమయంలో సెట్‌లో ఒక్కసారిగా భారీ అగ్నిప్రమాదం జరిగి, కొద్దిరోజుల పాటు చిత్రీకరణ నిలిచిపోయింది. అయితే విచిత్రంగా, దయ్యం పట్టినట్లు చూపించే ఆ చిన్నారి గది మాత్రం ఆ మంటల్లో ఎలాంటి నష్టం జరగకుండా సురక్షితంగా బయటపడింది. దాంతో సెట్‌లో ఏదో అదృశ్య అతీత శక్తి ఉందంటూ ఆ సమయంలో పెద్ద ఎత్తున చర్చ సాగింది.
అంతేకాకుండా, ఈ చిత్రంలో నటించిన కొందరు నటులు, వారి కుటుంబ సభ్యులు చిత్రీకరణ సమయంలోనూ, ఆ తర్వాత వరుసగా మరణించడం ఈ మిస్టరీని మరింత పెంచింది. దాదాపు 20 మంది వరకు ప్రాణాలు కోల్పోయారని చెప్పుకుంటారు. అయినప్పటికీ, ఈ మరణాలకు, సినిమాకి ప్రత్యక్ష సంబంధం ఉందని చెప్పడానికి ఎలాంటి శాస్త్రీయ ఆధారాలు లేవు.
1973లో ఈ సినిమా విడుదలైనప్పుడు, థియేటర్లలో ప్రేక్షకులు విపరీతమైన భయంతో స్పృహతప్పి పడిపోయారని, వాంతులు చేసుకున్నారని వార్తలు వచ్చాయి. థియేటర్ల బయట అత్యవసర సహాయం కోసం అంబులెన్స్‌లను సైతం సిద్ధంగా ఉంచారంటూ ప్రచారం జరిగింది. అయితే, వీటిలో చాలా వరకు ప్రచార వ్యూహాలు (పబ్లిసిటీ స్టంట్స్), పుకార్లు మాత్రమేనని విశ్లేషకులు చెబుతుంటారు. ఏది ఏమైనా, హారర్ సినిమా ప్రియుల గుండెల్లో ‘ది ఎక్సార్సిస్ట్’ నేటికీ చెరిగిపోని భయానక అద్భుతంగానే నిలిచింది.
Leave a Reply